काठमाडौं । दिल्ली डेयर डेभिल्सले बिहीबार सन्दिप लामीछानेलाई जर्सी प्रदान गरेको छ । होटल अन्नपूर्णमा दिल्लीले राष्ट्रिय खेलकुद परिषदका सदस्य सचिव केशवकुमार विष्टबाट सन्दिपलाई जर्सी प्रदान गरेको हो ।

 

नेपालबाट पहिलो पटक आईपिएलमा प्रतिनिधित्व गर्ने सन्दिपले १ नम्बर जर्सी पाएका छन् । सन्दिपलाई जर्सी प्रदान गर्न दिल्ली डेयर डेभिल्सका प्रमुख कार्यकारी अधिकृत हेमन्त दुआ लगायतको टोली नेपाल आएको थियो । सन्दिपले नेपाली राष्ट्रिय टोलीमा २५ नंम्बरको जर्सी लगाउँदै आएका छन्।

 

यसअघि प्रधानमन्त्री केपी शर्मा ओलीद्वारा जर्सी प्रदान गरिने भनिएपनि उनी कार्यक्रममा अनुपस्थीत रहे । कार्यक्रमबारे कुनै पनि जानकारी नआएको प्रधानमन्त्रीका प्रेस संयोजक चेतन अधिकारीले बताए ।

 

दिल्ली डेयर डेभिल्सकाअनुसार सन्दिपले नै उक्त नम्बर रोजेको हुन् । आईपीएलको अक्सनमा दिल्ली डेयरडेभिल्सले सन्दिपलाई २० लाख भारुमा अनुबन्ध गरेको थियो । लामीछाने आईपिएल हुनुअघि अभ्यासका लागि मंगलबार भारततर्फ प्रस्थान गर्नेछन् ।

 

आइपिएलमा पहिलोटक छनौट भएका सन्दिपले गौतम गाम्भरीको कप्तानीमा खेल्नेछन्। देल्लीको पहिलो खेल आउँदो अप्रिल ८ तारिखमा पञ्जाब विरुद्ध मोहालीमा हुनेछ।