जाजरकोट । जाजरकोटमा ठूलो परिमाणमा हतियार बरामद गरिएको छ । प्रहरीले जुनिचाँदे गाउँपालिका-११ कोर्ताङका चन्द्रबहादुर शाहीको घरबाट हतियार बरामद गरेकाे हो ।

 

बाह्रबोर बन्दुक २ थान, भरुवा बन्दुक ३ थान, दुई नाले बन्दुक १ थान, इयर गन १ थान, भरुवा बन्दुकमा प्रयोग हुने सिसाको गोली, बाह्रबोर बन्दुकमा प्रयोग हुने ७ थान खोका लगायतका हातहतियार बरामद गरिएकाे जिल्ला प्रहरी कार्यलयले जाजरकोटले जानकारी दिएकाे छ ।

 

अनुसन्धानका लागि चन्द्रबहादुर शाही र उनका छाेरा नेत्र शाहीलाई नियन्त्रणमा लिइएको छ । उनीहरुमाथि अनुसन्धान जारी छ । हतियार माओवादी जनयुद्धकालका भएको प्रारम्भिक अनुमान गरिएको छ ।

 

प्रहरीले विस्तृत अनुसन्धान गर्दैछ । जाजरकोटमा यसअघि पनि पटक-पटक ठूलो परिमाणमा हतियारहरु बरामद हुँदै आएको छ । स्थानीय चुनावताका पनि खलंगा-८ पिपेस्थित रानीवनमा लुकाइराखेको हतियार बरामद भएको थियो ।