विद्यार्थी नेताको चेतावनीः नेताहरुले नै चलाए निजी स्कुल, हामी खारेज गर्छौँ (भिडियाे)
एमालेले दम्भ नदेखाए हुन्छ
काठमाडौं । नेकपा एमाले र माओवादी केन्द्रका नेताहरुले वैशाख ९ गते पार्टी एकता गर्ने बताउँदैआएका छन् । तर पदीय भागबन्डा, चुनाव चिन्ह, एकीकृत पार्टीको विधानमा जनयुद्ध राख्ने वा नराख्ने जस्ता विषयमा अझै मतभेद छ ।
उक्त विषयलाई कसरी समधान गरिँदै छ । अझ दुबै पार्टीका आधार मानिने विद्यार्थी संगठनलाई कसरी एकता गराउने र विद्यार्थी नेताहरुलाई कसरी व्यवस्थापन गराउने भन्ने विषयबारे छलफल नै भएको छैन ।
एकीकृत विद्यार्थी संगठनको नेतृत्व कसले गर्छ ? कार्यदिशा के हुने ? भन्ने बारेमा चासो त धेरैलाई छ तर बहस भएको छैन । नेपाल आजले अनेरास्ववियु क्रन्तिकारीका अध्यक्ष रञ्जित तामाङसँग यही विषयमा कुराकानी गरेको छ । तामाङले पनि आफ्ना नेताहरु झैँ एकता हुनेमा ढुक्क रहेको बताए । बाँकी मुद्दा चाँडै सल्टिने भन्दै सबैलाई विश्वस्त रहन आग्रह गरे ।
‘एमाले अध्यक्ष केपी शर्मा ओली र प्रचण्ड कसैको कार्यकर्ता नभइ नेता हुन् । यसबारेमा एकता कार्यदलले पनि राम्ररी बुझेको छ,’ उनले भने, ‘उनीहरुको समान हैसियत भएरै पार्टी एकता हुन्छ । र विद्यार्थी संगठनमा पनि यही कुरा हो ।’
प्रतिशतका आधारमा एकता नहुने भन्दै समान हैसियतमा एकता हुनुपर्ने उनको भनाइ थियो । उनले थपे, ‘राजनीति गतिशिल हुन्छ । कहिले कुनै पार्टी ठूलो त कहिले अर्को पार्टी ठूलो हुन्छ । एमालेले पनि दम्भ देखाउनु हुँदैन ।’
संगठन व्यवस्थापन
विद्यार्थी संगठनको एकता सन्दर्भमा पनि उनले पार्टी झैँ समान हैसियतमा हुने दोहोर्याए । उनले भने, ‘महाधिवेशनसम्म नेतृत्वमा दुबै संगठनका नेताहरु समान हैसियतमा रहन्छन् ।’
विभिन्न समयमा विभिन्न विद्यार्थी संगठबीच एकता हुँदैआएकाले यो एकताले तात्विक भिन्नता नहुने उनको बुझाइ छ । यस्तै एकीकृत विद्यार्थी संगठनको मूल कार्यदिशा समाजवाद उन्मुख शिक्षा रहेको तामाङले बताए ।
निजी विद्यालय
पछिल्लो समय निजी विद्यालयले चर्को मुल्य अशुल्दैआएका छन् । विद्यार्थी संगठनहरु भने मौन देखिन्छन् । यस्तै सन्दर्भमा हामीले नेता तामाङलाई सोधेका थियौँ ।
उनले आफूहरु पनि निजी विद्यालयको लापरबाही रोक्न लागिपरेको भनेका छन् । आधारभुत शिक्षाको जिम्मेवारी स्थानीय तहलाई नै भए पनि स्थननीय तहले यसबारेमा चासो नदेखाएको भन्दै तामाङले आक्रोश व्यक्त गरे ।
सबैजसो निजी विद्यालय संचालनमा प्रमुख राजनीतिक दलका प्रमुख नेताहरुको संलग्नता भएकाले नियम कानुन पनि लागु गराउन जटिल रहेको उनी बाउँछन् ।
‘अब निजी विद्यालयहरुले उच्च शिक्षा अध्यापन गराउनुपर्छ, उनले भने । साथै आभारभुत शिक्षालाई निशुल्क बनाउन सरकारलाई दबाब दिने उनले बताए । र निकट भविष्यमै निजी विद्यालय खारेज गराउने उनको दाबी थियो ।
सरकारको काम कारबाही
आफ्नै पार्टी संलग्न रहेको सरकारले जनअपेक्षा अनुरुप काम गर्न नसकेको आरोप लगाउँदै मन्त्रीहरु प्रचारवाजीमा लागेको उनको गुनासो छ ।
प्रधानमन्त्री र मन्त्रीहरु काम गर्न भन्दा पनि हौवा पिटाउन लागिपरेको उनको बुझाइ छ । ‘काम भन्दा कुरा मात्र धेरै भए,’ उनले भने, ‘सुखी नेपाली र सम्मृद्ध नेपालको सपना पूरा गराउन यो तालमालले हुन सक्दैन ।’
पार्टी एकता विद्यार्थी संगठन रञ्जित तामाङ अनेरास्ववियु क्रन्तिकारी
