अब प्रतिपक्ष र सरकारमा रहेका दल मिल्नुपर्छ : प्रकाशमान
दलहरुमा आन्दोलन गर्न सबै मिल्ने र संस्थागत गर्ने क्रममा केही कमीकमजोरी देखिएका छन्
प्रमुख प्रतिपक्षी दल कांग्रेसका नेता प्रकाशमान सिंहले जनताको समृद्धिको चाहना पूरा गर्न सत्तापक्ष र प्रतिपक्ष मिलेर अगाडि बढ्नुपर्ने बताएका छन् ।
‘देशलाई आर्थिक रुपमा समृद्ध बनाउने सबैभन्दा ठूलो जिम्मेवारी सरकारमा रहेको दलको हुने भए पनि प्रतिपक्षको पनि भूमिका हुन्छ,’ बानेश्वर बहुमुखी क्याम्पसले बिहीबार आयोजना गरेको कार्यक्रमलाई सम्बाेधन गर्दै नेता सिंहले भने, ‘आर्थिक समृद्धिको चाहना चाँडोभन्दा चाँडो सफलतामा परिणत गर्नका लागि कांग्रेस पछि हट्दैन ।’
पूर्वउपप्रधानमन्त्री समेत रहेका कांग्रेस नेता सिंहले राजनीतिक परिवर्तनबाट प्राप्त उपलब्धिलाई संस्थागत गर्न सत्ता पक्ष र विपक्षी दल मिलेर अगाडि बढ्नुपर्नेमा जोड दिए ।
राजनीतिक दलहरु मिलेर संघर्ष गर्दा ठूला ठूला राजनीतिक परिवर्तन भएको तर, त्यसलाई संस्थागत गर्न नसक्दा फेरि अर्को आन्दोलन हुने गरेको चर्चा गर्दै उनले सबै मिलेर उपलब्धि संस्थागत गर्नुपर्नेमा जोड दिए ।
‘कुनै दल कुनै चुनावपछि सरकारमा जाला, कुनै प्रतिपक्षमा बस्नुपर्ला, यो ठूलो कुरा होइन,’ उनले भने, ‘यो राजनीतिक परिवर्तनबाट प्राप्त उपलब्धिलाई संस्थागत गर्न सत्ता पक्ष र विपक्षी दल मिलेर अगाडि बढ्नुपर्छ ।’
‘पोलिटिकल मुभमेन्ट सफल पनि हुन्छ । तर, सफल भएको केही वर्षमा अर्को परिवर्तनको लागि फेरि बेग्लै किसिमको आन्दोलन हुने गर्दछ,’ उनले भने, ‘हामी दलहरुमा पनि आन्दोलन गर्न सबै मिल्ने र संस्थागत गर्ने क्रममा केही कमीकमजोरी देखिएको छ ।’
संविधान कार्यान्वयन भइसकेको र संघीयता कार्यान्वयन भइसकेकाले अब त्यसलाई सशक्त रुपमा अघि बढाउनुको विकल्प नभएको उनले बताए ।
‘संविधानसभाबाट संविधान जारी भएको छ, हामी संघीयतामा छौं । यसलाई प्रभावकारी कार्यान्वयनको विकल्पै छैन,’ उनले भने, ‘बाधा अड्चन पन्छाएर विधिसम्मत तवरले यो सिस्टमलाई सशक्त रुपमा र संस्थागत रुपमा अघि बढाउनुबाहेक अर्को विकल्प छैन ।’
प्रकाशमान सिंह जनताको समृद्धि
