च्याम्पियन्स लिगअन्तर्गत क्वाटरफाइनलको पहिलो लेगमा लिभरपुलले म्यानचेस्टर सिटीमाथि ३–० को सानदार जित हात पारेको छ ।

 

घरेलु मैदान एनफिल्डमा भएको खेलमा लिभरपुलले ३१ मिनेटभित्रै तीन गोल गरेको थियो । १२ औं मिनेटमा मोहम्मद सलाहको गोलमार्फत लिभरपुलले प्रिमियर लिग लिडर सिटीविरुद्ध अग्रता लियो ।

 

सलाहको यो सिजनको ३८ औं गोल हो । तर उनी ५३ औं मिनेटमा चोटग्रस्त हुँदै मैदान बाहिरिएका थिए ।

 

२१ औं मिनेटमा अक्सलेड चेम्बरलेनले गोल गरेपछि सिटी दुई शुन्यले पछि पर्यो । त्यस्तै ३१ औं मिनेटमा साडियो मानेले हेडर गोल गर्दा लिभरपुल पहिलो हाफमा नै तीन शुन्यको अग्रता लिदै बलियो स्थितिमा पुगेको थियो । 

 

दोस्रो हाफमा पेप ग्वार्डिवालाको टोलीले सुधारिएको खेल खेले पनि गोल गर्न असफल भयो । खेलको सकिनै लाग्दा गाब्रिएल यसुसले गोल गरे पनि रेफ्रीले अफ साइड दिएका थिए ।

 

जितसँगै लिभरपुलले क्वाटरफाइनलमा पूर्ण रुपमा नियन्त्रण जमाएको छ । अब सिटीलाई भने सेमिफाइनल पुग्न दोस्रो लेगमा फराकिलो जित आवश्यक पर्नेछ ।