सुन तस्करीको आरोपमा जिल्ला अदालत काठमाडौंको आदेशअनुसार थुना रहेका बन्दीलाई उपस्थित गराउन उच्च अदालत पाटनले आदेश दिएको छ । उच्च अदालतका न्यायाधीशद्वय प्रेमराज ढकाल र हेमराज पन्तको संयुक्त इजलासले सुन तस्करका आरोपी कुन्साङ लामालाई अदालतमा उपस्थित गराउन आदेश दिएको हो ।

 

लामाले दिएको निवेदनमा पहिलो सुनुवाइ गर्दै उच्च अदालतले झगडिया झिकाउने आदेश गरेको हो । उच्च अदालतले अर्को सुनुवाइमा उनलाई थुनामा राख्ने या जिल्ला अदालतको आदेश सदर गर्नेबारे आदेश जारी गर्नेछ ।

 

प्रहरीको अनुसन्धानका क्रममा लामाले आफू गाडीचालक मात्रै भएको बयान दिएका थिए । चीनको केरुङबाट रसुवागढी हुँदै काठमाडौं भित्र्याएको सुन कसको थियो भन्ने अनुुसन्धानकै क्रममा छ । चीनको केरुङबाट रसुवागढी हुँदै जिप ल्याइएको सुन आफ्नो नभएको लामाले बयान दिएका थिए ।

 

२४ पुस ०७३ मा प्रहरीले लामालाई अवैध सात केजी सुनसहित काठमाडौंको कलंकीबाट पक्राउ गरेको थियो । सरकारी वकिलको कार्यालय काठमाडौंले लामालाई तीन करोड १६ लाख २६ हजार बिगो र पाँच वर्ष कैद सजाय माग गर्दै मुद्दा दायर गरेको थियो ।

 

अदालतको आदेशपछि लामालाई जेल चलान गरिएको थियो । जिल्ला अदालत काठमाडाैंको आदेशपछि लामाले ३१ असोज ०७४ मा पुनरावेदनको माग गर्दै उच्च अदालत पाटनमा निवेदन दिएका थिए । याे खबर नयाँ पत्रिका दैनिकमा छ । 

सुन तस्करी उच्च अदालत पाटन प्रेमराज ढकाल हेमराज पन्त