डा. उपेन्द्र देवकोटाको पशुपति आर्यघाटमा अन्त्येष्टि
काठमाडौं । वरिष्ठ न्युरो सर्जन डा. उपेन्द्र देवकोटाको मंगलबार अपरान्ह पशुपति आर्यघाटमा अन्त्येष्टि गरिएको छ ।
सोमबार साँझ बाँसबारीस्थित न्यूरो अस्पतालमा निधन भएका डा. देवकोटाको पार्थिव शरीरमा पत्नी डा. मधु देवकोटा, छोरीहरु मेधा, बसुधा र मञ्जरीले दागवत्ती दिएका हुन् ।
देवकोटाको विद्युतीय माध्यमबाट शवदाह गरिएको छ । पूर्व स्वास्थ्यमन्त्रीसमेत रहेका देवकोटालाई कार्यवाहक प्रधानमन्त्री एवं उपप्रधान तथा रक्षामन्त्री ईश्वर पोखरेलले राष्ट्रिय झण्डा ओढाएका थिए ।
शिरमा ढाका टोपी पहिरिदिएर उनको पार्थिव शरीरलाई ब्रह्मनालमा विधिपूर्वक पूजा गरिसकेपछि सशस्त्र प्रहरीको एक टुकडीले सलामी अर्पण गरेको थियो ।
त्यसपछि छोरीहरुले बोकेर उनको शव विद्युतीय शवगृहमा लगेका थिए। देवकोटा निवास हेपाली हाइटमा पत्नी र छोरीहरुले ७ दिन काजक्रिया गर्नेछन् ।
डा. उपेन्द्र देवकोटा अन्त्येष्टि
