काठमाडौं । इथियोपियामा प्रधानमन्त्री आबी अहमदले सम्बोधन गरिरहेको एक र्‍यालीमा ग्रिनेड आक्रमण भएको छ । राजधानी अदिस अबाबाको मुख्य चोक मेस्कल स्क्वायरमा प्रधानमन्त्री  अहमदले हजारौं सहभागी र्‍यालीलाई सम्बोधन गरिरहेको बेला ग्रिनेड प्रहार भएको हाे ।

 

उक्त विष्फोटमा परि थुप्रै मानिसकाे ज्यान गएकाे छ । प्रधानमन्त्री  अहमदलाई भने सुरक्षित स्थानमा लगिएको बीबीसीले जनाएको छ ।  प्रधानमन्त्री अहमदले धेरै व्यक्ति आक्रमणमा मारिएको बताएका छन् । तर, क्षतिको एकीन विवरण आइसकेको छैन ।

 

उनले यस आक्रमणमा इथियोपियाको एकता देख्न नचाहने तत्वको हात रहेको बताएका छन् । तर, त्यो तत्व को हो भन्ने खुलाएका छैनन् । २४ वर्षीय अहमद गत फेब्रुअरी महिनामा प्रधानमन्त्री बनेका थिए । उनी ओरोमो जातीय समूहबाट प्रधानमन्त्री बन्ने पहिलो व्यक्ति हुन् ।

 

करिब तीन वर्षअघि सरकार विरोधी प्रदर्शनको अगुवाइ अहमदले गरेका थिए । सो प्रदर्शनमा सयौंको ज्यान गएको थियो । त्यसपछि तत्कालीन प्रधानमन्त्रीले राजीनामा दिएपछि अहमदले सत्ता सम्हालेका थिए । प्रधानमन्त्री बनेलगत्तै उनले सेना प्रमुख र गुप्तचर प्रमुखलाई बर्खास्त गरेका थिए ।

इथियोपियामा प्रधानमन्त्री आबी अहमद ग्रिनेड आक्रमण