रुकुम (पश्चिम) । मुसीकोट नगरपालिका–१, सल्लेमा मंगलबार एक महिलाको शव फेला परेको छ । घरको आफनै कोठामा ४५ वर्षीया आइती बुढाको शव फेला परेको हो । 

 

बाहिरबाट ताला लाएको अवस्थामा बुढाको शव भेटिएको जिल्ला प्रहरी प्रमुख प्रहरी नायव उपरीक्षक सुमित खड्काले बताए । मृतक बुढाका छोराले ताल्चा फोडेर भित्र जाँदा आमाको शव भेटिएको भन्दै प्रहरीलाई खबर गरेका थिए । 

 

केही दिनदेखि कोठामा ताल्चा लाइरहेको र आमालाई कतै नदेखेपछि ताल्चा फोडेको मृतकका छोराले प्रहरीलाई बताएका छन् । शव गन्हाउने अवस्थामा भेटिएकाले घटना पुरानो हुनसक्ने प्रहरीले अनुमान गरेको छ । 

 

मृतकको बाँया निधारमा गहिरो चोट लागेको छ । घटना रहस्यमय देखिएकाले आवश्यक अनुसन्धान भइरहेको प्रहरी नायव उपरीक्षक खड्काले जनाकारी दिए । जिल्ला अस्पताल सल्लेमा शवको पोष्टमार्टम गरिसकिएको छ ।