विश्लेषक आचार्यको ठोकुवाः प्रचण्डको राष्ट्रपति मोहले ओलीको समृद्धि धरापमा (भिडियाेसहित)
'याे समयमा कार्यकारी राष्ट्रपतिको कुरा गर्नु प्रचण्डको उत्ताउलोपना'
काठमाडौं । यतिबेला संघीय लोकतान्त्रिक गणतन्त्रात्मक व्यवस्थालाई कार्यान्वयन गर्ने सुरुवाती कार्य भइरहेको छ । यो व्यवस्थालाई सफल रूपमा कार्यान्वयन गरेर नेपाली जनताको वर्षौंदेखिको समृद्ध नेपालको सपना पूरा गर्ने हुँकार प्रधानमन्त्री केपी शर्मा ओलीले गरिरहेका छन् ।
तर, सत्तासीन दल नेपाल कम्युनिस्ट पार्टीका अध्यक्ष पुष्पकमल दाहाल (प्रचण्ड) ले भने वर्तमान शासकीय स्वरूप नै बदल्नु पर्ने( कार्यकारी राष्ट्रपति) बताउन थालेका छन् । यो विषयले नेपाली राजनीतिमा फेरि तरंग ल्याएको छ ।
प्रचण्डको यो अभिव्यक्तिको आलोचना र समालोचन हुन थालेको छ । के यो समयमा प्रचण्डले कार्यकारी राष्ट्रपतिको विषय ल्याउनु उचित थियो ? पूरा होला त प्रचण्डको कार्यकारी राष्ट्रपति बन्ने चाहना ? यस्तै सरकार र प्रतिपक्ष दलको सय दिन साथै नेपाली कांग्रेसको आगामी यात्राबारे राजनीतिक विश्लेषक पुरञ्जन आचार्यसँग नेपालआजका लागि लोकेन्द्र भट्टले गरेको विशेष अन्तर्वार्ता ।
विश्लेषक आचार्यले अन्तर्वार्ताकाे क्रममा शासकीय स्वरूप परिवर्तनबारे प्रचण्डले दिएको अभिव्यक्ति समयानुकूल नभएको बताए । उनले भने, ‘भर्खरै सबै तहको निर्वाचन भएर बल्ल देशमा स्थिर सरकार बनेर खुसी नेपाली र समृद्ध नेपालको नारा लगाइरहेका बेला फेरि शासकीय स्वरूप परिवर्तन गर्छु भन्नु समय सुहाउँदो तर्क हैन ।’
स्थिर र बलियो सरकाबाट केही हुन्छ कि भन्ने जनताको आशा रहेको भन्दै यसले फेरि निराश बनाउने उनको बुझाइ छ ।बहुमतको आडमा यस्तो हर्कत गरिएको खण्डमा जनतामाथि बेइमानी हुने उनी बताउँछन् ।
‘प्रचण्ड र ओलीले स्थिर सरकार र समृद्धिका लागि जनतासँग मत मागेका थिए । कुनै शासकीय स्वरूप परिवर्तन थिएन । त्यसैले अबको पाँच वर्ष विकास र समृद्धिको लागि पर्नुपर्छ’, आचार्यले भने ।
प्रचण्डले यतिबेला उठाएका कार्यकारी राष्ट्रपति प्रणालीको बहस नेपाली कांग्रेसले नै सबैभन्दा पहिले बहसमा ल्याएको उनी बताउँछन् । यो प्रणाली गलत हैन । तर, प्रचण्डले गलत समयमा बहस गराउन खोज्नु उत्ताउलो भएको आचार्यकोे बुझाइ छ ।
उनले भने, ‘कार्यकारी राष्ट्रपति बन्ने प्रचण्डको व्यक्तिगत महत्वाकांक्षा हुन सक्छ । तर, नेपाली जनताको चाहना र समयको माग हो कि हैन, यसबारे प्रचण्ड जस्तो नेताले बुझ्न जरुरी हुन्छ ।’
सरकार र प्रतिपक्षका सय दिन
ओली नेतृत्वको सरकार तयारीबिना सत्तारोहण गरेको भन्दै सय दिनमा गर्नै पर्ने तीन कार्यहरूमा चुकेको आचार्यले बताए । उनले भने, ‘शासकीय सुधारात्मक कदमहरूको ओली सरकार नीतिगत सुधारतर्फ गर्ने कुरामा चुक्यो ।
प्रधानमन्त्रीको सुखी नेपाली समृद्ध नेपालको नारा नीतिगत सुधारबाट मात्र सम्भव छ । तर, सय दिनको अवधिमा एउटा पनि क्रान्तिकारी काम गर्ने संकेत सरकारले देखाउन सकेन ।’ सय दिनको अवधिमा सरकारले जुन खालको गति लिनुपर्ने थियो त्यो अनुसारअगाडि बढ्न नसकेको उनी बताउँछन् ।
‘वर्तमान सरकार कम्युनिस्ट नेतृत्वको हो भन्ने झल्कोसमेत छैन । नेपालमा दुईथरी नेपाली छन् । पहिलो सत्तासँग पहुँच भएका र अर्को सत्तासँग कुनै पनि पहुँच नभएका । के विश्वास गरिन्थ्यो भने सत्तासँग कुनै पहुँच नभएका आम नेपालीको सत्ता कम्युनिस्ट सरकारको निर्माणसँगै सुरु हुनेछ भनी । तर, देखिएन’, उनले भने ।
सरकारले सय दिनमा शिक्षा र स्वास्थ्यमा एकरूपता ल्याउने नीति अगाडि सारिसक्नुपर्ने भन्दै उनले यो नगरेर नेपालमा शान्ति र समृद्धिको सपना बाँड्नु भनेको हावादारी गफ मात्र भएको बताए ।
प्रदेश र स्थानीय सरकारलाई शक्तिशाली र सम्पन्न बनाउने भन्नेतर्फ ओली सरकार उदार नदेखिएको उनको ठम्याइ छ । उनले अहिले नै ओली सरकार काम नलाग्ने अवस्थामा पुगिसक्यो भनेर छिचोल्नु उपयुक्त नभएको पनि बताए ।
प्रतिपक्ष
गएका सय दिनमा प्रमुख प्रतिपक्षी दल नेपाली कांग्रेसको भूमिकामा निरीह देखिएको आचार्यले बताए ।
उनले भने, ‘कांग्रेस डिप्रेसनबाट अझैँ मुक्त हुन सकेको छैन भन्ने कुरा सय दिनको गतिविधिले पुष्टि गर्छ ।
दुई तिहाइसहितको कम्युनिस्ट सरकारसँग नेपाली कांग्रेस भयग्रस्त मानसिकताबाट उठ्न नसकेको आचार्यको बुझाइ छ । कांग्रेसका केन्द्रदेखि सातै प्रदेशमा सशक्त प्रतिपक्षको भूमिका निर्वाह गर्ने नेता नै नभएको उनी बताउँछन् ।
उनले भने, ‘प्रतिपक्ष दलको नेताले सरकारमा भइरहेका गलत गतिविधि जनतासामु पस्किनु पर्छ । तर, त्यसो हुन सकेको छैन । प्रतिपक्षी भनेको नै गगन एन्ड कम्पनी हो कि जस्तो भएको छ ।’
कांग्रेसको भविष्य
स्थानीय, प्रदेश र संघको निर्वाचनमा पराजयको समीक्षा गर्ने सन्दर्भमा कम्युनिस्ट मिल्दा कांग्रेस हा¥यो भन्ने समीक्षा हुनु लज्जाको विषय भएको आचार्यले बताए ।
उनले भने, ‘कांग्रेस तीन थरीका छन् । परमोसन, छाताधारी, र परफरमेन्स । परमोसन र छाताधारीले डिप्रेसनमा रहेको कांग्रेसको उपचार गर्न सक्दैनन् । युवामा ठूलो सम्भावना रहेको छ । उनीहरूलाई अगाडि ल्याउनुपर्छ कांग्रेसको उपचार गर्न ।’
कांग्रेसलाई पुनर्जीवन दिन नेतृत्वमा चार गुण हुन आवश्यक रहेको उनको बुझाइ छ । उनका अनुसार अबको समय गगन थापाका लागि उपयुक्त रहेको छ ।
‘गगनले समयानुसार एजेन्डा उठाउन सक्ने क्षमता राख्छन् ।’ आचार्यले भने, ‘मास तताउन पनि सक्छ । ऊर्जावान् भएकाले देश दौडाह गर्न सक्ने र मिडियाको राम्रै साथ रहेकाले उनलाई अगाडि ल्याउँदा आसा गर्न सकिन्छ ।’
उनले थपे, ‘रामचन्द्र पौडेल र शेखर कोइरालाले गगनलाई साथ दिएमा निकट भविष्यमै सुधारको संकेत देख्न सकिने उनको भनाइ छ । वर्तमान सभापति शेरबहादुर देउवाबाट कांग्रेसको पुनर्जीवन हुनै नसक्ने उनले दाबी गरे ।
प्रचण्ड सरकार गगन थापा शेरबहादुर देउवा कार्यकारी राष्ट्रपति प्रतिपक्ष पुरञ्जन आचार्य
