कैलालीमा आमाछोरा मृत अवस्थामा फेला
काठमाडाैं । कैलालीमा दुई आमाछोरा मृत अवस्थामा फेला परेका छन् । बर्दगोरिया गाउँपालिका–२ कुण्डीमा ४ वर्षीय बालक र एक महिलाको घरभित्र झुण्डिरहेको अवस्थामा फेला परेको हो । मृत्यु हुनेमा लालबहादुर डगौराको २० वर्षिया श्रीमती सीता र ४ वर्षिय छोरा संकेत रहेको जिल्ला प्रहरी कार्यालय कैलालीका प्रहरी उपरीक्षक (एसपी) विनोद घिमिरेले जानकारी दिए ।
गोठमा काम गरिरहेकै अवस्थामा लालबहादुरले छोरासहित श्रीमती नजिकै रहेको घरमा झुण्डिएको थाहा पाएपछि छिमेकीलाई खबर गरेका थिए ।
छिमेकीले प्रहरीलाई खबर गरेपछि आमाछोराको शव निकालिएको थियो । घरको ढोकाको भित्रबाट चुकुल लगाएकोले सीताले छोराको हत्या गरेर आत्महत्या गरेको हुनसक्ने प्रहरीको आशंका छ ।
मृतक आमाछोराको शव पोष्टमार्टमको लागि टीकापुर अस्पताल लगिएको एसपी घिमिरेले जानकारी दिए ।प्रहरीले सोधपुछका लागि भन्दै लालबहादुरलाई नियन्त्रणमा लिएको छ ।
केही समयअघि मात्रै भारतबाट घर र्फकेका उनी फेरि मजदुरीका लागि भारत जाने तयारी गरेका थिए ।
