एजेन्सी । ईण्डोनेशियामा विमान दुर्घटनामा भग्नावशेषमा एकजना १२ वर्षीय बालक जीवितै फेला परेका छन् । सो विमानमा दुईजना चालकदलका सदस्यसहित ९ जना सवार थिए । दुर्घटनामा परी आठ जनाको ज्यान गएको छ ।

 

पपुआ न्यू गिनीसँगको सीमानजिकै रहेको एउटा पहाडी क्षेत्रमा आइतवार बिहान विमानको भग्नावशेषसँगै उनी फेला परेका हुन्।

 

स्वीट्जरल्याण्डमा निर्मित पिलाटुस विमान उडिरहेको अवस्थामै, एउटा विमानस्थलमा अवतरण गर्नु केही बेरअघि, शनिवार दिउँसो एअर ट्राफिक कन्ट्रोलसँग सम्पर्क टुटेको थियो ।

 

भाडामा हवाईजहाज उपलब्ध गराउने निजी कम्पनी डिमोनिम एअर टन्ना मेरा भन्ने स्थानबाट ४० मिनेट दक्षिणतर्फ पपुआ प्रान्तमा रहेको ओक्सिबिलतर्फ उड्ने क्रममा दुर्घटनाग्रस्त भएको थियो ।

 

समाचार संस्था एएफपीका अनुसार नजिकैको गाउँका बासिन्दाले ’एउटा विस्फोटसँगै ठूलो गर्जन’ सुनेका थिए । दुर्घटनाको कारणबारे छानबिन थालिने अधिकारीहरूले बताएका छन्।

 

पुग्नका लागि निकै कठिन रहेको गाम्रीण तथा पहाडी क्षेत्र पपुआ प्रान्तसम्म पुग्ने माध्यम नै विमानहरू हुन् । तर तीव्र गतिमा बदलिरहेको मौसमी अवस्थाको अर्थ भनेको त्यहाँसम्म हवाई यात्रा गर्न सहज छैन ।

 

तीन वर्षअघि त्रिगना एअरको एउटा ट्वीन टर्बोप्रोप विमान पनि ओक्सिबिलनजिकै दुर्घटनाग्रस्त हुँदा ५४ जनाको ज्यान गएको थियो ।

ईण्डोनेशियामा विमान दुर्घटना बालक जीवितै फेला