चितवन । प्रहरी कार्यालय हेटौंडाबाट खटिएको प्रहरी टोलीले प्रतिबन्धित लागूऔषध ११३ किलो गाँजासहित एक जना पक्राउ गरेको छ ।

 

चितवनको शक्तिखोरबाट गाँजा लोड गरी बाराको जितपुर गइरहेको ना४ख २९३ नम्बरको ट्रक र उक्त ट्रकका चालक विष्णु भक्त श्रेष्ठलाई प्रहरी निरीक्षक रोशन थापाको कमाण्डमा खटिएको प्रहरी टोलीले मकवानपुरको मनहरीबाट आइतबार नियन्त्रणमा लिएको हो ।

 

उक्त नम्बरको कन्टेनरमा प्रतिबन्धित लागूऔषध ल्याइरहेको भन्ने गोप्य सूचनाको आधारमा प्रहरी टोलीले पिछा गर्दै जाने क्रममा उनीहरूलाई पक्राउ गरिएको बताइएको छ ।

 

कन्टेनरको पछाडि पट्टीको भागमा ६ वटा प्लास्टिकको बोरामा राखी लुकाइछिपाइ ल्याएको ३५ वटा प्याकेटमा गरी जम्मा ११३ किलो गाँजा बरामद गरिएको प्रहरीले जनाएको छ ।

 

बरामद गरीएको गाँजा र सवारी साधन सहित आवश्यक कारबाहीको लागि ईलाका प्रहरी कार्यालय मनहरीमा बुझाइएको छ । गाँजाको मुख्य खरिद र विक्री गर्ने व्यक्तिहरूको भने खोजतलास गर्ने कार्य भैरहेको प्रहरीले जनाएको छ ।
 

११३ किलो गाँजा एक जना पक्राउ