के तपाईंमा कसैलाई ब्लफ कल गरेर सताउने बानी छ ? छ भने अब त्यागी हाल्नुस् । ब्लफ कलकै कारण अब जेलसमेत जानु पर्ने व्यवस्था गरिएको छ ।  आउँदो १ भदौदेखि लागू हुने मुलुकी अपराध (संहिता) ऐनमा यस्तो कसुर गर्नेलाई २ वर्ष कैद वा २० हजार जरिवाना वा दुबै सजाय हुने व्यवस्था छ ।

 

अपराध संहिताको धारा २९९ मा भनिएको छ ‘कसैले आफ्नो परिचय दिई वा नदिई कसैलाई छल्ने, धोका दिने, हैरानी पार्ने वा सताउने उद्देश्यले छलकपटपूर्ण टेलिफोन वा सन्देश प्रवाह गर्न गराउन हुदैन ।’

 

संहिताले गोपनीयताविरुद्धको कामलाई कसुर घोषणा गर्दै कडा कारवाहीको व्यवस्था गरेको हो ।

 

यस्तै, टेलिफोन वा फेसबुकबाट धम्की दिनेलाई १ वर्ष कैद वा १० हजार जरिवानाको व्यवस्था गरिएको छ । कसैलाई डर त्रास, हैरानी दिने, अपमान गर्ने, बेइज्जत गर्ने उद्देश्यले चिठीपत्र, पर्चा वा कुनै लिखत लेखाउने र विद्युतीय माध्यमबाट धम्की दिने, सताउने जिस्क्याउने वा अनुचित व्यवहार गर्नेलाई यस्तो सजायको व्यवस्था गरिएको छ ।

 

यो ऐन लागू भएपछि अनुमति नलिई अरुको घरमा छिर्नेलाई ३ वर्षसम्म कैद वा ३० हजार जरिवानाको व्यवस्थासमेत गरिएको छ । घर भन्नाले कोठा, होटल, शिविर र पाललाई समेत जनाइएको छ ।

मुलुकी अपराध (संहिता) ऐन