इमरान खान पाकिस्तानको २२ औं प्रधानमन्त्री
काठमाडौं । पाकिस्तानको नयाँ प्रधानमन्त्रीका रुपमा इमरान खानले शनिबार सपथ ग्रहण गरेका छन् ।
मुलुकको सवैभन्दा ठूलो पार्टी पाकिस्तान तेहरिक ए इन्साफ (पीटीआई)बाट प्रधानमन्त्रीको उम्मेदवार भई विजयी भएका खान पाकिस्तानको २२ औँ प्रधानमन्त्री बनेका हुन् ।
प्रधानमन्त्री बन्नका लागि आवश्यक पर्ने १ सय ७२ मतमध्ये प्रतिनिधिसभामा शुक्रबार भएको निर्वाचनमा खानले १ सय ७६ मत पाएपछि उनलाई शनिबार शपथ ग्रहण गराइएको हो ।
खानका प्रतिस्पर्धी तथा पाकिस्तान मुस्लिम लिगबाट प्रधानमन्त्रीको उम्मेदवार बनेका शाहबाज शरिफले भने ९६ मत मात्रै प्राप्त गरेका थिए ।
शपथग्रहण समारोहमा उच्च पदस्थ व्यक्ति, विदेशी पाहुनाहरुसँगै उनकी श्रीमती बुशरा मेनका पनि सहभागी भएको समाचारमा जनाइएको छ ।
खानले आफ्नो मन्त्रीपरिषद् १५ देखि २० सदस्यीय मात्र बनाउने प्रतिबद्धता व्यक्त गरेका छन् ।
गत जुलाई २५ तारिखमा पाकिस्तानमा भएको आमनिर्वाचनबाट पूर्व्क्रिकेटर खानको पार्टी तेहरिक–ए–इन्साफ (पिटीआई) ले ११४ स्थानमा जित हासिल गरेर सवैभन्दा ठूलो पार्टी भएको छ ।
सरकार गठनका लागि आफुले मात्रै बहुमत प्राप्त नगरेकाले उहाँले गठबन्धन सरकार बनाउनु पर्ने भएको छ । विपक्षीहरूले अस्विकारेकाले विवादका बीच निर्वाचन आयोगले सार्वजनिक गरेको नतिजाअनुसार प्रमुख तीन दल तेहरिक–ए–इन्साफले १ सय १४, पूर्वप्रधानमन्त्री नवाज शरिफको पार्टी पाकिस्तान मुस्लिम लीगले ६३ र पाकिस्तान पिपुल्स पार्टीले ३९ स्थान जितेका छन् ।
सन् १९९२ मा भएको विश्वकप क्रिकेटको उपाधि कब्जा गर्न सफल पाकिस्तानी टिमको नेतृत्व गरेका विश्व चर्चित खान अहिले प्रधानमन्त्री बनेका हुन् ।
देशमा भ्रष्टाचारविरोधी अभियान चलाउँछु : इमरान खान
यसैबीच शुक्रबार पाकिस्तानको संसद्द्वारा प्रधानमन्त्रीमा निर्वा्चित र शनिबार शपथ खानु भएका इमरान खानले देशमा भ्रष्टाचारविरोधी अभियान सञ्चालन गर्ने बताएका छन् ।
उनले भने, ‘मैले विगतदेखि नै पाकिस्तानमा व्याप्त भ्रष्टाचार विरोधी अभियान चलाएको हो र अब देशको नेतृत्व गरेपछि पनि मैले यसलाई थप गति दिनेछु ।’
पाकिस्तानी संसद्ले शुक्रबार प्रधानमन्त्रीमा निर्वा्चित गरेपछि उनले देशमा भ्रष्टाचार गर्ने र राष्ट्रको सम्पत्ति लुट्ने कुनै पनि मानिसलाई आफूले नछोड्ने प्रतिबद्धता व्यक्त गरेका छन् ।
उनले पाकिस्तानमा आफूले परिवर्तन ल्याउने प्रतिबद्धता पनि व्यक्त गरे । पाकिस्तान नयाँ मुस्लिम राष्ट्रका रूपमा स्थापना भएदेखि नै पाकिस्तानी जनताले स्थायित्व र सुशासनको लागि प्रतिक्षा गरेपछि गएका ७१ वर्षमा त्यो सम्भव नभएको भन्दै आफूले देशवासीको परिवर्तनको चाहनालाई पूरा गर्ने बताए ।
उनले आफू राजनीतिक परिवारको सदस्य नभएको स्पष्ट गर्दै भने, ‘न मैले र न त मेरा बुवा या परिवारका अरू कुनै सदस्यले राजनीति गरेका थिए तर मैले भने पाकिस्तानमा निरन्तर २२ वर्षदेखि राजनीतिमा सक्रिय भएर जनताको सामु केही बाचा गरेको छु ।’
‘जनतासमक्ष गरेका यिनै बाचाहरूले नै आफूलाई पाकिस्तानी नागरिकले सत्तामा पु-याएका हुन् भन्दै अब उनीहरूका लागि र देशका लागि पनि मैले केही गर्छु भनेर लागेको छु, उनले भने ।
पाकिस्तानमा अहिले भ्रष्टाचार व्यापक मात्रामा मौलाएको छ भन्दै यसका कारण जनतामा निराशा छाएको र देशको आर्थिक अवस्था पनि झन कमजोर हुदै गएकोले आफूले भ्रष्टाचार विरोधी अभियानमा लाग्ने निधो गरेको उनले बताए ।
आफ्नो यही बाचाका कारण नै पाकिस्तानी नागरिकले आफूलाई मत दिएर जिताएको र देशको प्रधानमन्त्रीको जिम्मेवारी पनि दिलाएको जानकारी दिए । राजनीतिक परिवारबाट नआएका पूर्वक्रिकेटर खानको नेतृत्वलाई पाकिस्तानमा नयाँ आशाका रूपमा लिइएको छ ।
