काठमाडाैं । डोल्पाबाट तत्कालिन नेकपा एमाले हालको नेपाल कम्युनिष्ट पार्टी (ने क पा)बाट निर्वाचित सांसद धनबहादुर बुढालाई राजिनामा गराएर उनकोे स्थान बर्दियाबाट पराजित नेकपा नेता तथा पूर्वउपप्रधानमन्त्री वामदेव गौतमलाई संसदमा ल्याउने तयारी भइरहेका बेला डोल्पाका युवाले बुढाको राजिनामालाई रोक्ने प्रयास थालेका छन् ।

 

डोल्पाली जनता आफ्नो गोजीका भोटर हुन भन्ने सोचेर सरकारले यो चालेको कदम चालेको भन्दै युवाहरूले आक्रोश पोखेका छन् । पूर्व पर्यटनराज्यमन्त्री समेत रहेका बुढा २०७४ सालको निर्वाचनमा नेपालकै सबैभन्दा बढी प्रतिशत मत ल्याइ विजयी भएका उम्मेदवार हुन् । उनलाई राजिनामा गराई नेकपाले उपनिर्वाचन मार्फत नेता गौतमलाई संसदमा ल्याउने तयारी गरिरहेको छ ।  डोल्पामा बुढाले ११ हजार ७६१ मत ल्याएका थिए भने निकट प्रतिस्पर्धी कांग्रेसका अंगदकुमार बुढाको मत ३ हजार १६७ थियो ।

 

त्यस्तै बाँकी दुई उम्मेदवारमध्ये हर्कबहादुर ठकुल्लाले २० र अर्जुनबहादुर शाहीले २२ मत ल्याएका थिए ।  यसैक्रममा काठमाडौंमा रहेका डोल्पाका युवाले पत्रकारहरूसँग शुक्रबार छलफल गरेर वामदेवलाई स्वागत गर्न चाह पनि त्यो पाँच वर्षपछि मात्र हुनुपर्ने बताएका छन् । वामदेव मध्य पश्चिमकै नेता भए पनि मध्यपश्चिमले वामदेवबाट केही नपाएको युवा ज्ञानेन्द्रकुमार शाहीले बताए ।  ‘अहिले कर्णाली प्रदेश बन्यो, त्यसभन्दा अगाडि मध्यपश्चिम थियो ।

 

डोल्पा मध्यपश्चिमको विकट जिल्ला वामदेव मध्यपश्चिमकै नेता उहाँले मध्यपश्चिमलाई के गर्नुभयो?’ उनले प्रश्न गर्दै भने, ‘काठमाडौँलाई रेलको आवश्यकता होला, तर डोल्पालाई रेल चाहिएको छैन ।’

डोल्पा धनबहादुर बुढा वामदेव गौतम