चीनले भन्यो, ‘हाम्रो जुन बन्दरगाह चाहिन्छ नेपालले प्रयोग गरे हुन्छ, तर हाम्रा मालवाहक ट्रक नेपाल जान पाऊन्’
काठमाडौं । कलकत्ता बन्दरगाहपछि नेपालले अघिल्लो पटक केपी ओली नै प्रधानमन्त्री भएको बेला विशाखापट्नम बन्दरगाह प्रयोग गर्न अनुमति पाइसकेको छ ।
अब चीनले पनि रोजेर बन्दरगाह प्रयोग गर्न नेपाललाई ग्रिन सिग्नल दिएको छ । नेपालबाट चार हजार किलोमिटर टाढा छ, इष्ट चाइना सी (पूर्वी चिनियाँ समुद्र), जो कोरियासँग नजिक छ ।
राजधानी बेइजिङनजिकै , अढाई सय किलोमिटरको दूरीमा छ, थ्यान्जिन । चीनले हालै बेइजिङ बोलाएको एउटा नेपाली टोलीसँग ‘त्यो लिएपनि हुन्छ वा त्यस बाहेक कुन चाहिन्छ, हामी दिन तयार छौँ’ भनेको छ । ट्रेड एण्ड ट्रान्जिटको प्रोटोकलमा सही गर्न आउने भनेको चिनिँया टोली अर्को महिना सेप्टेम्बरमा एक महिना ढिला गरेर आउँदै छ ।
चीन पक्षको माग छ , नेपालमा आफ्नै मालबाहक सवारी साधनलाई प्रवेश दिइयोस् । नेपालले पनि शिगात्सेसम्म आफ्ना सवारी साधन जान दिनुपर्ने भनेको छ । राणाकालको युद्वमा नेपाली पक्षले जितेर आफ्नो उपस्थिति त्यहाँसम्म पुर्याएको थियो । चीनले नेपालजस्तै भूपरिवेष्ठित राष्ट्र मंगोलियालाई आफ्नो बन्दरगाह खुल्ला गरिदिएजस्तो नेपालका लागि खुला गर्ने भएको हो । तर, धेरै चक्के ठूला मालवाहक सवारी साधन छिर्नका लागि नेपालसँग फराकिलो बाटोको अभाव छ ।
रसुवागढी र तातोपानीका पुराना पुल भत्काइँदै छ । नयाँ पुल बनाइने भएको छ । तर त्यो बनिसक्न पनि केही वर्ष लाग्छ । गल्छीबाट रसुवागढी जाने होस् या टोखा छहरे खण्ड होस्, एक लेनको साँघुरो बाटो छ । नेपालले त्यसलाई दुई लेनको बनाउने प्रतिबद्धता जनाए बमोजिम भित्ता फोर्ने काम धमाधम भइरहेको छ । चीनले १८ दिनमा अष्ट्रियाको भियना पुग्ने रेलमार्ग बनाइसक्यो भने उसले आफ्नो रेल वा गाडी नेपाल ल्याउन कुनै झन्झट हुने कुरै भएन ।
–जनआस्था साप्ताहिकबाट
