काठमाडौँ । राजधानी काठमाडौँको ज्याठा क्षेत्रमा भीषण आगलागी भएको छ । मंगलबार बिहान साढे ४ बजेदेखि सुरु भएको आगलागीपछि त्यहाँ ५ वटा भन्दा धेरै दमकल आगो निभाउन पुगेका छन् । 

 

जमलको एल्लो प्यागोडा होटेलबाट भित्रतर्फको सानो गल्लीमा अवस्थित सुनिलजंग स्थापितको घरमा रहेको ट्राभल एजेन्सीको कार्यालयबाट आगो लागेको हुन सक्ने अनुमान प्रहरीले गरेको छ । आगलागीबाट कम्तिमा पनि २ घरको अधिकांश भाग जलेको छ भने अर्को एउटा घरमा पनि क्षति भएको छ ।

 

महानगरीय आयुक्तको कार्यालय रानीपोखरीका अनुसार आगो लागेपछि हिमाल आरोहणका क्रममा प्रयोग गरिने अक्सिजन ग्यास सिलिन्डर विस्फोट हुँदा ज्याठा र क्षेत्रपाटी क्षेत्रका बासिन्दा भागाभाग भएका थिए । 

 

आगलागीका क्रममा भाग्न खोज्दा केही स्थानीयबासी लडेर घाइते समेत भएका छन् । आगो लागेपछि झ्यालबाट हामफालेर भाग्ने क्रममा घाइते भएका २ जनालार्इ उपचारका लागि अस्पताल पठाइएको महानगरीय प्रहरी वृत्त दरबारमार्गले जानकारी दिएको छ ।

 

स्थानीयबासी सागर तुलाधरका अनुसार मिनेट मिनेटको अन्तरमा पुरै ज्याथा क्षेत्र थर्किने गरी करिब ४० देखि ५० वटा अक्सिजन ग्यास सिलिन्डर पड्किएका थिए । 

 

क्षेत्रपाटीमा बस्दै अाएका पत्रकार शोभित थपलियाका अनुसार अक्सिजन ग्यास सिलिन्डर विस्फोटको अावाजले ज्याथा र क्षेत्रपाटी क्षेत्रबासीबीच भागाभाग भएको थियो । ग्यास विस्फोटपछि त्यस क्षेत्रका मानिसहरू सबेरै बिहान घर छाडेर जमलतर्फ सुरक्षित स्थानमा निस्केका छन् । 

 

आगोले ठुलो रुप लिएपछि अहिले जमल क्षेत्रमा उपत्यकाका सबै दमकल पुगेका छन् । तर साँघुरो गल्लीबाट दमकल नपसेपछि पाइप छिराएर आगो निभाउने कोशिश भइरहेको छ । करिब एक घण्टा बितिसक्दा पनि आगो नियन्त्रणमा आउन सकेको छैन ।

 

आगलागीको कारण बिजुली सर्टबाट बताइए पनि प्रहरीले एकिन नभइसकेको जनाएको छ । अहिले ज्याठातर्फबाट दुइटा र ठमेलतर्फबाट एउटा दमकलले आगो निभाइरहेका छन् ।- अन्नपूर्णपाेष्टबाट ।

काठमाडौं आगलागी एल्लो प्यागोडा होटेल