निर्मलाका आमाबाबु भन्छन्, ‘आश्वासन धेरै पायौँ, न्याय चाहियो गृहमन्त्रीज्यू’
बलात्कारपछि हत्या गरिएकी कञ्चनपुरकी १३ वर्षीया निर्मला पन्तका आमाबाबुले न्यायको आश मरिसकेको बताएका छन् । शुक्रबार गृहमन्त्री रामबहादुर थापा बादललाई ज्ञापनपत्र बुझाएर फर्केपछि निर्मलाका आमाबाबुले सरकारबाट आश्वासन धेरै पाएको भन्दै अब न्याय चाहिएको बताए । ‘आश्वासन धेरै पायौँ, न्याय चाहियो गृहमन्त्रीज्यू,’ ज्ञापनपत्र बुझाउने क्रममा निर्मलाकी आमा दुर्गादेवीले भनिन् ।
गृहमन्त्रीले भने चिन्ता लिनु नपर्ने भन्दै दोषी पक्राउ पर्ने आश्वासन दिए । ‘हामी अपराधीको धेरै नजिक पुगिसकेका छौँ, चिन्ता लिनुपर्दैन, गृहमन्त्रीका रूपमा अपराधी पक्राउ नपर्दा मलाई पनि धेरै पीडा भइरहेको छ,’ गृहमन्त्री थापाको जवाफ थियो । तर, गृहमन्त्रीको जवाफबाट उनीहरू खुसी हुन सकेनन् ।
किनकि यस्ता आश्वासन उनीहरूले धेरैपटक पाइसकेका छन् । गृहमन्त्री थापाले एक महिनाअघि नै दुई अभियुक्त पक्राउ परिसकेको भनेर संसद्मा बोलेका थिए ।
गृहमन्त्रीसँग भेटेर निस्किएपछि गृह मन्त्रालय परिसरमा निर्मलाका बाबु यज्ञराजले भने, ‘आश्वासनको अब विश्वास लाग्न छाडिसक्यो ।’
५१ दिन बित्यो हत्या भएको
निर्मलाको हत्या भएको ५१ दिन भइसकेको छ । प्रहरी अनुसन्धान शून्यमा छ । हत्या आरोपमा प्रहरीले सार्वजनिक गरेका दिलीपसिंह विष्ट छुटिसकेका छन् ।
निर्मलाको शव भेटिएको ११ साउनदेखि निरन्तर सरकारलाई दबाब दिइएको छ । तर, सरकारले कसले निर्मलाको हत्या ग-यो भन्ने जवाफ दिन सकेको छैन ।
अनुसन्धानमा अलमलिएपछि प्रहरीले सर्वसाधारणको आशंकाको आधारमा तत्कालीन एसपी डिल्लीराज विष्ट, उनका छोरा किरण तथा अर्का स्थानीय युवकको समेत डिएनए परीक्षण अघि बढाएको छ ।
प्रहरीका अनुसार निर्मलाको गुप्तांगमा वीर्य भेटिएको थियो । यौनांगको बाहिरी भाग, बीचको भाग र भित्री भागमा रहेको वीर्य संकलन गरी डिएनए परीक्षण प्रक्रिया अघि बढाइएको थियो ।
सुरुमा प्रहरीले स्थानीय दिलीपसिंह विष्ट र चक्रदेव बडूको पनि डिएनए परीक्षण गरिएको थियो । तर, डिएनए नमिलेपछि उनीहरू छुटिसकेका छन् ।
डिएनएबाहेक प्रहरीले अनुसन्धानको अरू बाटो नै भेटेको छैन । १० साउन दिउँसो घटनास्थलको मोबाइल लोकेसन हेरेर अनुसन्धान गरे पनि प्रहरीले केही पत्तो लगाउन सकेको छैन ।
प्रहरी अनुसन्धानमा अर्काे लापरबाही : घटनास्थलमा किन लगिएन कुकुर ?
शवको प्रकृतिकै आधारमा निर्मलाको बलात्कारपछि हत्या भएको अनुमान गर्न गाह्रो थिएन । यस्तो गम्भीर घटनामा प्रहरीको सुरुवाती अनुसन्धान भने उदेकलाग्दो थियो ।
प्रहरीले घटनास्थलको सुरक्षामा समेत चासो दिएन । अर्काेतर्फ यस्ता घटनामा प्रहरीले तालिमप्राप्त कुकुरको सहयोग लिने गर्दछ । तर, यो घटनाको अनुसन्धानमा कुकुर नझिकाइनुले प्रहरीको नियतमाथि झन् प्रश्न उठेको छ ।
यदि तालिमप्राप्त कुकुर लगिएको भए अभियुक्त कुन बाटो गएका थिए भन्ने पत्ता लाग्थ्यो । जसले प्रहरीले अनुसन्धानका लागि सहजता हुनसक्थ्यो । तत्कालीन प्रहरी प्रमुख विष्टले अनुसन्धानमा चरम लापरबाही गरेका थिए ।
पाँच दिनसम्म पनि उनी घटनास्थल नगएको गृह मन्त्रालयद्वारा गठित उच्चस्तरीय छानबिन समितिका एक अधिकारीले बताए । प्रहरीले सुरुदेखि नै आफूहरूलाई असहयोग गरेको र घटनास्थलको सुरक्षा गर्नभन्दा इन्सपेक्टर एकेन्द्र खड्काले उल्टो धम्काएको निर्मलाका बुबा यज्ञराज बताउँछन् ।
संसद्मा गृहमन्त्री थापाले भने ‘६ महिनामा मुलुकको शान्ति सुरक्षा राम्रो ’
गृहमन्त्री रामबहादुर थापाले सरकार गठन भएपछिको ६ महिनामा शान्ति सुरक्षा कायम विगतको भन्दा राम्रो भएको दाबी गरेका छन् ।
विपक्षी दलका सांसदले सरकार गठन भएदेखि हालसम्म बलात्कार, हत्या हिंसाको घटना वृद्धि भएको भन्दै सरकारको आलोचना गरेपछि गृहमन्त्रीले अपराध तथा गुण्डागर्दी नियन्त्रणमा सरकार सफल भइरहेको बताएका हुन् ।
प्रतिनिधिसभा र राष्ट्रिय सभा शुक्रबारको बैठकमा गृहमन्त्री थापाले हत्या, हिंसा, बलात्कारको घटनामाथि सरकारले गरिरहेको छानबिनबारे जानकारी गराए ।
‘६ महिनाको कालखण्ड सुरक्षाको दृष्टिकोणले सबैभन्दा कालो कालखण्ड हो कि भन्ने गम्भीर विषय उठाउनुभयो । सरकार र गृह मन्त्रालयको निष्कर्ष यो छैन । यस अवधिमा शान्ति सुरक्षा कायम गर्ने, अपराध नियन्त्रण गर्ने कुरामा सबैभन्दा राम्रो भएको छ भन्ने निष्कर्ष छ,’ गृहमन्त्रीले भने ।
निर्मला हत्याको गहन छानबिन भइरहेको छ
गृहमन्त्री थापाले कञ्चनपुरकी निर्मला पन्तको बलात्कार तथा हत्या घटनाको छानबिन गर्न गठित समितिका सबै सदस्य तथा उनीहरूका परिवारलाई सरकारले आवश्यक सुरक्षा दिएको बताए ।
छानबिन समितिका एक सदस्यले राजीनामा दिएको विषयमा संसद्मा विपक्षी सांसदहरूले प्रश्न गरेपछि गृहमन्त्रीले सुरक्षाको प्रत्याभूति दिलाएपछि उनी समितिमा फर्किएको जानकारी दिए ।
निर्मला पन्तको बलात्कार र हत्या प्रकरणको विषयले आमजनमानसमा चिन्ता उत्पन्न गरेको भन्दै गृहमन्त्री थापाले पन्तको हत्याको विरोधमा भएको आन्दोलनका क्रममा मृत्यु भएका सनी खुना र पन्तको परिवारलाई १०/१० लाख रुपैयाँ क्षतिपूर्ति दिएको बताए । ‘मृतकलाई सहिद घोषणा गरिएको छ । घटनाको विस्तृत छानबिन भइरहेको छ,’ उनले भने ।
राजपाले माग्यो जवाफ
प्रतिनिधिसभाको शुक्रबारको बैठक प्रारम्भमै राजपा नेपालले प्रहरी हिरासतमा मृत्यु भएका राममनोहर यादवको मृत्यु हुनाको कारणबारे जानकारी माग गरेको थियो ।
राजपाका नेता लक्ष्मणलाल कर्णले शान्तिपूर्ण आन्दोलनको पक्ष भनेकै कालो झन्डा देखाउनु भएको बताउँदै झन्डा देखाउँदैमा पक्राउ गर्नु र हिरासतमा मृत्यु हुनु शंकास्पद भएको बताए ।
‘शान्तिपूर्ण आन्दोलनको पक्ष भनेकै झन्डा देखाउनु हो । नत्र के लठ्ठी,भाला देखाउने बन्दुक देखाउने ?’ उनले प्रश्न गरे । उनले संसदीय छानबिन समिति गठन गरेर निष्पक्ष छानबिनको माग गरे ।
बर्दियामा प्रहरीले हिरासतमा लिएका यादवको काठमाडौंस्थित शिक्षण अस्पतालमा उपचारको क्रममा १६ भदौमा मृत्यु भएको थियो । राजपाले उठाएको प्रश्नको गृहमन्त्री थापाले तत्काल जवाफ दिएका थिए । मेडिकल रिपोर्टमा कुटपिटबाट नभई रोगको कारणले मृत्यु भएको गृहमन्त्री थापाले बताए । -नयाँ पत्रिकाबाट ।
कञ्चनपुर निर्मला पन्त
