रेडपाण्डाको संरक्षण गर्न पढाइ सुरु
काठमाडौं । विश्वमै लोपोन्मुख मानिएको हाब्रे (रेडपाण्डा) जोगाउनका लागि इलाममा विभिन्न विद्यालयमा हाब्रेसम्बन्धी पढाइ सुरु भएको छ ।
इलामका विभिन्न स्थानमा हाब्रे पाइने गरेको तर उचित संरक्षण नहुँदा यसको लोप नै हुने स्थितिमा पुगेको छ ।
उच्च पहाडी संस्थाको आयोजना र रेडपाण्डा नेटवर्क काठमाडौंको आर्थिक सहयोगमा जिल्लाका तीन विद्यालयमा पठाइ सुरु गरिएको छ । विद्यालयस्तरदेखि नै हाब्रेसम्बन्धी जानकारी गराउन सक्दा उचित संरक्षण हुने भएकाले पढाइ सुरु गरिएको रेडपाण्डा संरक्षण परियोजनाका संयोजक धनबहादुर खाम्दाकले बताए । विशेषगरी कक्षा ६ र ७ का विद्यार्थीका लागि हाब्रेसम्बन्धी जानकारी दिन लागिएको हो ।
खाम्दाकका अनुसार विद्यालयमा हाब्रेसम्बन्धी मात्र नभई पारिस्थितिक पद्धति, वन तथा वन्यजन्तुलगायत विषयमा पनि पाठ्यक्रममा समावेश गरिएको छ । जिल्लाका सन्दकपुर गाउँपालिकास्थित जमुनामा रहेका राष्ट्रिय आधारभूत माध्यमिक विद्यालय, भानुदय माध्यमिक विद्यालय र सन्दकपुर गाउँपालिकाकै माइपोखरीमा रहेको चन्द्रोदय माध्यमिक विद्यालयमा पढाइ सुरु गरिएको हो । यसै वर्ष थप चार विद्यालयमा समेत पढाइ सुरु गरिने तयारी गरिएको छ ।
रेडपाण्डा नेटवर्कका अनुसार जिल्लामा ३० देखि ३५ वटा हाब्रे रहेकोे तथ्यांक छ । तर, जिल्लामा हाब्रेसम्बन्धी जनचेतना नभएको र कुकुरलगायत जीवजन्तुबाट जोगाउन नसक्दा जोखिममा परेका छन् । केही महिनाअघि मात्र इलाम नगरपालिकाको पुवामझुवामा कुकुरले सिकार गरेको अवस्थामा एक हाब्रे फेला परेको थियो ।
हाब्रे (रेडपाण्डा)
