पक्राउ परेका एक किशोर हत्कडीसहित फरार
सिन्धुली । जबरजस्ती करणीको आरोपमा प्रहरीले काठमाडौंबाट प्रक्राउ गरी सिन्धुली ल्याउने क्रममा एक किशोर प्रहरीको साथैबाट हत्कडीसहित फरार भएका छन् ।
जवरजस्ती करणी गरी फरार रहेका सर्लाही ईश्वरपुर नगरपालिका–५ का सन्जु भनिने संजय परियारलाई पक्राउ गरी ल्याउने क्रममा सिन्धुलीको सुनकोशी गाउँपालिका–३ बाट पुनः फरार भएको जिल्ला प्रहरी कार्यालय सिन्धुलीले जनाएको छ ।
विशेष सुराकीको आधारमा काठमाडौंबाट पक्राउ गरी ल्याउने क्रममा सुनकोशी गाउँपालिका ३ को पूर्ण थकाली होटलमा खाना खाई गाडी चढ्ने क्रममा आरोपी परियार हत्कडीसहित फरार भएको सिन्धुलीका प्रहरी प्रमुख प्रहरी उपरीक्षक रामेश्वरप्रसाद यादवले बताए ।
फरार परियारलाई खोजतालास गरिए पनि हालसम्म फेला नपरेको प्रहरी उपरीक्षक यादवको भनाइ छ । उचाइ अन्दाजी ५ फिट ४ इन्च, कपाल पहेँलो रंगको, अनुहार लाम्चो, पातलो शरीर, रातो रंगको भेष्ट लगाएको, कालो रंगको कोरियन जिन्स लागाएको र हातमा हतकडी रहेको हुलियामा फरार परियार देख्ने भेट्नेले नजिकको प्रहरी कायालयमा खबर गरी आवश्यक सहयोग गर्न प्रहरीले आग्रहसमेत गरेको छ ।
