काठमाडौं । उपत्यकाका नदी र चक्रपथ सफाइ गरी शनिबार २७ मेट्रिक टन फोहोर व्यवस्थापन गरिएको छ । वाग्मती सफाइ महाअभियानको २७८ औँ हप्तामा बानेश्वर क्याम्पस अघिको नदीमा सफाइ गरियो । 

 

सफाइमा अधिकार सम्पन्न वाग्मती सभ्यता एकीकृत विकास समिति, काठमाडौं महानगरपालिका, नेपाली सेना, नेपाल प्रहरी, सशस्त्र प्रहरीलगायत २० संस्थाका ४ सय भन्दा बढी अभियानकर्मीको सक्रियता थियो । 

 

लामो समयदेखि नदी किनारको फोहर उठ्न नसक्दा दुर्गन्ध फैलिएको अधिकार सम्पन्न वाग्मती समितिकी सञ्चालक सदस्य माला खरेलले जानकारी दिए । 

वाग्मतीको मुहान सुन्दरीजलदेखि नै सफाइ गर्ने अभियान चलाएको वाग्मती सुन्दरता सरोकार मञ्चले २३९ औँ हप्ताको सफाइ गोकर्णेश्वर महादेव मन्दिर परिसरमा गरेको छ । नगरपालिका-४ का अध्यक्ष श्रीकुमार श्रेष्ठको संयोजनमा भएको सफाइमा प्रदेशसभा सदस्य रामेश्वर फुयाँललगायत जनप्रतिनिधिको सहभागिता थियो । 

 

आइतबार परेको बाबुको मुख हेर्ने औँशीको अघिल्लो दिन मन्दिर परिसर सफाइ गरिएको मञ्चका अध्यक्ष उत्तम पुडासैनीले बताए । सफाइबाट चार मेट्रिक टन फोहर व्यवस्थापन गरियो । कुहिने फोहर त्यही गाडियो । नकुहिने फोहर सोमबार बिहान व्यवस्थापन गरिने छ । मन्दिर परिसरमा आइतबार र सोमबार पनि निरन्तर सफाइ गरिने जनाइएको छ । 

 

सफाइमा मुहानदेखिकै नदी सफाइ अभियानमा जुटेका राम्रो जोरपाटी, हाम्रो जोरपाटी, पुडासैनीमैत्री समाज, माकलबारी टोल सुधार समितिलगायत संस्थाको पनि सक्रियता थियो । 

 

रुद्रमती सफाइको २३३औँ हप्तामा रातोपुल-मैतीदेवी-सेतोपुल-रुद्रनगरसम्म सफाइ गरी एक मेट्रिक टन फोहर व्यवस्थापन गरियो । रुद्रमती सरोकार समाजको नेतृत्वमा भएको सफाइमा वडा नं ३० का अध्यक्ष दलबहादुर कार्की, वातावरण संरक्षण अभियान, प्रसिद्धि कला समूहलगायत संस्थाका १५० भन्दा बढी अभियानकर्मीको सहभागिता रहेको संयोजक रोहित गिरीले जानकारी दिए । 

 

विष्णुमती सफाइको २०५ औँ हप्तामा टोखा र तारकेश्वर नगरपालिकाको सीमास्थित मनमैँजुमा सफाइ गरियो । सफाइमा तीनवटा सुरक्षा निकायसहित २५० भन्दा बढी अभियानकर्मीको सहभागिता थियो । सफाइबाट चार मेट्रिक टन फोहर व्यवस्थापन गरिएको संयोजक विजेन्द्र लामाले जानकारी दिए । 

 

यसैगरी मनोहरा सफाइको ७६ औँ हप्तामा बालकुमारीस्थित नदी क्षेत्रमा सफाइ गरी एक मेट्रिक टन फोहर व्यवस्थापन गरियो । चक्रपथ सफाइको ७४ औँ हप्तामा तिलगङ्गा-गैरीगाउँ पेट्रोलपम्पसम्म सफाइ गरियो । 

 

३५० जना अभियानकर्मीको सक्रियतामा भएको सफाइबाट १० मेट्रिक टन फोहर व्यवस्थापन गरिएको संयोजक लोकबहादुर टण्डनले बताए । चक्रपथको दायाँबायाँ पनि फोहरको डङ्गुर थुप्रिएको उनले बताए । 

 

आलोकनगर सफाइको ७४ औँ हप्तामा त्यस क्षेत्रमा सफाइ गरी एक मेट्रिक टन फोहर व्यवस्थापन गरियो । सफाइसँगै घरदैलोमा गई जनचेतनामूलक कार्यक्रम आयोजना गरिएको संयोजक प्रमिला पौडेलले बताए । 

२७ मेट्रिक टन फोहोर नदी र चक्रपथ सफाइ