ब्राजिलको बाँध भत्केर मृत्यु हुनेको संख्या ३४ पुग्यो, ३०० बढी बेपत्ता
एजेन्सी । ब्राजिलको दक्षिणपूर्वी क्षेत्रमा एउटा बाँध भत्किँदा वेपत्ता बनेका करिब ३०० जनालाई जीवितै उद्धार गर्ने आशा झिनो बनेको स्थानीय उद्धारकर्मीले जनाएका छन् ।
शुक्रबार दिउँसो करिब १ बजे भएको उक्त घटनामा परी मृत्यु हुनेको संख्या ३४ पुगेको ३०० भन्दा बढी व्यक्ति हराइरहेका छन् । मिनास गेरियस राज्यको बेलो होरिजोन्टे शहरमा एक्कासी पहिरो गएपछि वेपत्ता बनेका कसैलाई पनि शनिबार जीवित उद्धार गर्न नसकिएको उनीहरूले बताएका छन् ।
मिनासका गभर्नर रोमेउ जेमाले सञ्चारकर्मीलाई भने, 'उद्धार प्रयास निरन्तर भइरहेपनि घटनामा परेका व्यक्तिहरू जीवितै पाइने आशा झिनो बनेको छ ।'
घटनापछि ब्राजिलका राष्ट्रपतिले आफ्नो डाभोस सम्मेलनको कार्यक्रमलाई छोट्याएर शुक्रबार नै स्वदेश फर्किएका शनिबार घटनास्थल जाने कार्यक्रम छ । यसअघि उक्त घटनामा १५० जना वेपत्ता बनेको बताइए पनि शनिबार सरकारी अधिकारीहरूले नै उक्त संख्या ३०० को हाराहारीमा रहेको हुनसक्ने बताएका छन् ।
बाँध भत्किएका कारण प्रत्यक्ष तथा अप्रत्यक्ष रूपमा शहरको करिब ३९ हजार जनसंख्यामा प्रभाव परेको बताइएको छ । बाँध फुटेर एक्कासी ठूलो मात्रामा शहर र नजिकैका घरहरू, सडकहरू, तरकारी तथा अन्य बालीमा प्रभाव परेको अधिकारीले जनाएका छन् ।
ब्राजिल बाँध भत्केर मृत्यु
