प्रतिनिधिसभा बैठकमा कांग्रेसले लगातार सभामुख कृष्णबहादुर महराको भूमिकामाथि प्रश्न उठाउँदै आएको छ । केही दृष्टान्त यसप्रकार छन : 

क ) संसद्मा सांसद् गगन थापाले बोल्दै गर्दा निर्धारित समय सकिनु अगावै माइक काटियो । कांग्रेसले सभामुख महराको भूमिकामाथि प्रश्न उठायो । 
ख ) संसद्मा प्रधानमन्त्रीलाई प्रश्न सोध्न माग गर्दा सभामुख महराले प्रश्न सोध्न नदिएपछि फेरि एकपटक महराको भूमिकामाथि कांग्रेसले प्रश्न उठायो ।  
ग ) संसद्मा चिकित्सा शिक्षा बिधेयक पारित गर्नेक्रममा बिपक्षी दलमाथि असहिष्णु र जालझेलपूर्ण व्यवहार गरेको भन्दै सभामुख महराको भूमिकामाथि फेरि कांग्रेसले प्रश्न उठायो । 

यी तीनवटा दृष्टान्तलाई मात्र हेर्दा कांग्रेस सभामुख महरासंग पूर्णतः असन्तुष्ट छ । सभामुख तटस्थ बन्न नसकेको, पदीय मर्यादा कायम राख्न नसकेको, पार्टीको कार्यकर्ता भन्दामाथि उठन नसकेको लगायतका आरोप उनीमाथि लगाइएको छ । यो आरोप लगाउनेमा सबैभन्दा अग्रपङ्तीमा गगन थापा, डा. मिनेन्द्र रिजाल, डा.अमेरशकुमार सिंह र दिलेन्द्र बडु रहेका छन् । यी चारैजना सांसद्ले संसद्मा औंला ठड्याउँदै सभामुखप्रति आक्रोश पोख्दै आएका छन । कांग्रेसका अन्य सांसद् भने आज्ञाकारी बालक झैं यी चार जना जताजता जान्छन, जे जे गर्छन त्यही अनुसार चल्छन ।

यतिसम्मकी प्रमुख सचेतक बालकृष्ण खाँण स्वयं आफनो भूमिकाप्रति अनभिज्ञ जस्ता देखिन्छन् । उनले न्यायपूर्णरुपमा भूमिका निर्वाह गर्न नसकेको स्वयं कांग्रेसकै सांसदहरुको गुनासो छ । एक सांसद्का अनुसार खाँण आफना सांसद्हरुले जय नेपाल भन्दापनि अल्छी पाराले अनुहारै नहेरी घोसेमुन्टो लगाएर जय नेपाल फर्काउँछन रे । यसले कांग्रेस संसदीय दलमै सांसद् र प्रमुख सचेतकबीच कतिको अन्तक्रिया र सरसल्लाह हुन्छ भन्ने देखाउँछ ।

खाँणकै यस्तो शैलीले सरकारको नीति तथा कार्यक्रम कांग्रेसकै समर्थनमा पारित भएको थियो । वास्तवमा त्यो बेला सरकारको नीति कार्यक्रममा कांग्रेसले समर्थन गर्ने कुनै निर्णय भएको थिएन तर प्रमुख सचेतक नै सचेत नभएर बसेकाले अन्य सांसदहरु रनभुल्लमा परेका मात्र हुन् । त्यहीबेला सभामुख महराले नीति कार्यक्रम सर्वसम्मती पारित भएको घोषणा गरेपछि खाणसहित कांग्रेसका सांसद ट्वाँ परेका थिए । यो बिषयमा खाणले पार्टी भित्रै ठूलो आलोचना सहनु परेको थियो । 

सभामुखको निर्वाचनका बेला कांग्रेसले महराबिरुद्ध आफनो उम्मेदवार पनि उठाएको थिएन । कांग्रेस केन्द्रीय सदस्य तथा प्रतिनिधिसभा सदस्य मीन बिश्वर्माका अनुसार महरामाथिको बिश्वास र उनले निष्पक्ष भूमिका निर्वाह गरुन भनेर नै उनीबिरुद्ध उम्मेद्वार खडा गरिएको थिएन । ऐन, नियम, कानून निर्माणमा महराले बिपक्षी दललाई समेत बिश्वासमा लिएर अघि बढन सजिलो होस भनेर आफूहरुले उम्मेद्वार खडा नगरेको उनको भनाइ छ । तर, एक बर्ष नबित्दै उनै महरामाथि कांग्रेसले शृखंलाबद्धरुपमा गम्भीर प्रश्न उठाएको छ । 

तर, यी प्रश्न संसद्मा मात्र सिमित भए । सांसद् गगन थापा, मिनेन्द्र रिजाल, अमरेशकुमार र दिलेन्द्र बडुमा मात्र सिमित भए । सभामुखले सरकारसंग मिलेर संसदीय सर्वोच्चतामाथि नै धावा बोलेको निष्कर्ष निकालेपनि कांग्रेस बाहिर भने मौन छ ।

यतिसम्म की सरकारबिरुद्ध आन्दोलन घोषणा गर्दै भ्रातृसंगठनहरुलाई सडकमा उतारिसकेको कांग्रेस सभामुखका बिषयमा मौन छ । यदि सभामुखका कारण संसदीय व्यवस्था नै खतरामा परेको हो भने कांग्रेस केन्द्रीय समितिमा यो बिषयमा किन केही निर्णय भएन ? सडक आन्दोलन गरिरहेका नेबिसंघ, तरुण दल तथा महिला संघका ब्यानरमा किन सभामुखको बिषय लेखिएको छैन ? निर्मला पन्त हत्या प्रकरण, फुटकर केही भ्रष्टाचारका मुद्दा लगायतका बिषय समेट्न सक्ने कांग्रेसले सभामुखका बिषयमा चुँइक्क पनि गर्न नसक्नु रहस्यको पाटो भएको छ । 

सभामुख महरा आफैमा रोचक र रहस्यात्मक पात्र हुन् । चीनीयाँ नागरिकसंग ५० करोड रूपैयाँ मागेको अडियो सार्वजनिक भएको प्रसंग होस वा सुन तस्करीको बिषयमा हामी त साना माछा हौं भनेर आफैलाई तस्कर जस्तो देखाएको बिषय किन नहोस, यी सबैले उनी राष्ट्रिय र अन्तर्राष्ट्रिय शक्तिकेन्द्र तथा गिरोहसंग घनिष्ट सम्बन्ध भएका व्यक्ति हुन भन्ने कुरा स्पष्ट गर्दछ ।  केही बर्षअघि उनले नेपालगंजबाट सरकारका एक सचिवलाई...म महरा बोलेको भन्दै जिल्लाको एक कार्यक्रममा बजेट छुट्याइदिन दिएको दबाब पनि सामाजिक संजालमा भाइरल बनेको थियो । 

नेकपा एमाले र माओवादी केन्द्रको सरकार रहेकाबेला एमालेलाई धोका दिएर कांग्रेससंग सरकार बनाउने चाँजोपाँजो यीनै महराले मिलाएका थिए । अझ अचम्म के भने चीनसंग नजिक भनिएका महरा एकाएक भारत निकट भएको चर्चा पनि यहीबेला चल्यो । उनका गतिविधि र भूमिकाले पनि धेरै अर्थमा यो बिषयलाई पुष्टि नै गर्यो । चीन र भारत दुवैसंग सन्तुलन मिलाउन सक्ने भन्दै तत्कालिन प्रधानमन्त्री पुष्पकमल दाहाल ‘प्रचण्ड’ ले उनलाई खुबै प्रयोग गरे । मुलुक र पार्टीलाई फाइदा बेफाइदा केही नभएपनि उनी भने लगातार लाभको पदमा बस्न पाउने भाग्यमानी भए । उनको कला र शक्तिको महिमा अपरम्पार छ तर सबै भूमिगत शैलीमा । 

यीनै महराको भूमिकामाथि प्रश्न उठाउँदा कतै कांग्रेसलाई महंगो परिरहेको त होइन ? सांसद गगन थापाले सभामुखलाई महंगो पर्ने छ भनेर चेतावनी त दिए तर यो बिषयमा पार्टीमा औपचारिक छलफल र निर्णय नहुँदा थापाको भनाइ पानीको फोका जस्तै हराउने निश्चित छ । 

द्वन्द्वकालदेखि सरकार परिवर्तन र हालसम्मको राजनीतिक अवस्था, आर्थिक मामिला, ओसारपसार, साँठगाँठ लगायतका कतिपय अवस्थामा महरा र कांग्रेसका नेताहरुबीच सन्धी सम्झौता भएको कुरा कांग्रेसकै नेताहरुले बताउने गरेका छन । 

बिभिन्न कालखण्डमा महरासंग गरिएका व्यवहार नै आज कांग्रेसलाई गलपासो बनेको छ । संसद्मा महरामाथि चोर औंला ठड्याएर जति चिच्याए पनि संसद् बाहिर भने कांग्रेस नेताहरु महरासंग थुरथुर छन । बलवान महरा !