सप्तरी - सप्तरीस्थित गजेन्द्र नारायण सिंह अस्पतालमा तोडफोड भएकाे छ। डाक्टर ड्यूटीमा नआएको भन्दै विरामीका आफन्तले अस्पतालमा तोडफोड गरेका हुन्।

डा.ज्ञानेन्द्र झा र डा.प्रनेश यादव दिउसो २ बजेसम्म पनि अस्पताल नआएपछि आक्रोसित विरामीका आफन्त तथा विद्यार्थीहरुले नाराबाजी गर्दै तोडफोड गरेका हुन्। तोडफोड र प्रदर्शनका कारण सोमबार अस्पताल तनावग्रस्त बनेको छ। 

तोडफोडका कारण डा.झा र डा.यादवको विरामी जाँच्ने कोठामा क्षति पुगेको अस्पताल प्रशासनले जनाएको छ। प्रहरीले तोडफोडमा संलग्न भएको आरोपमा राजविरा-१ निवासी गुन्जन झालाई पक्राउ गरेको छ।

अस्पताल प्रशासनले भने डा.झा बिदामा रहेको र डा.यादव सो समयमा आपतकालिन कक्षमा एक विरामीको उपचार गरिरहेको दाबी गरेको छ। तनावग्रस्त बन्दै गएपछि अहिले अस्पतालमा परिषरमा सुरक्षाकर्मी परिचालन गरिएको छ।