विप्लवका दाजुसहित २१ नेताविरुद्ध राज्यविरुद्धको मुद्धा
दाङ - नेत्र विक्रम चन्द विप्लव समुहका २१ नेता तथा कार्यकर्ताहरुलाई प्रहरीले राज्यविरुद्धको अपराधमा मुद्धा दर्ता गरेको छ। बिहिवार अति विकट क्षेत्र दाङकाे राजपुर गाउँपाालिकाको मुंग्रेठा भन्ने स्थानबाट नियन्त्रणमा लिइएका विप्लवका नेता तथा कार्यकर्ताहरुलाई शुक्रबार जिल्ला अदालतमा मुद्धा दर्ता गरिएको हो।
जिल्ला प्रहरी प्रमुख एसपी जनक भट्टराईले उनीहरुलाई राज्यविरुद्धको अपराधमा मुद्धा दर्ता गरी अनुसन्धान गरिरहेको बताए।
मुंग्रेठास्थित ज्ञानेन्द्र विक्रम रानाको घरमा उक्त समूहको राप्ती ब्यूरोको बैठक चलिरहेको बेला प्रहरीले बिहिबार बिहान २ करिब बजे नियन्त्रणमा लिएको थियो।
बिहिवार पक्राउ परेका उनीहरुको नाम प्रहरीले शुक्रबार मात्रै सार्वजनिक गरेको छ। पक्राउ पर्नेहरुमा विप्लवका दाजु चन्द्रबहादुर चन्द, सत्तारूढ दल नेकपाका नेता झक्कु सुवेदीका छोरा सन्तोष सुवेदी लगायतका छन्। सांसद सुवेदीका छोरा सन्तोष विप्लव समुहको राप्ती व्यूरो सदस्य तथा रोल्पा जिल्ला ईन्चार्ज हुन्।
प्रहरीले उनीहरुको साथबाट विभिन्न हतियारसमेत बरामद गरेको जनाएको छ। प्रहरीले मेड ईन युएसए लेखिएका दुई दुई राउण्ड गोली लोड भएका दुई थान पेस्तोल, चारथान कटुवा पेस्तोल, पाँच राउण्ड राइफलको गोली बरामद गरिएको जनाएको छ।
यसैगरि सुतली बम एकथान, केन्द्रीय समितिको आठौं पूर्ण बैठकको राजनीतिक प्रस्ताव लेखिएका तीन वटा ठेली, आर्थिक सहयोग माग गर्न तयार पारिएका ३० पाना लेटर प्याड, नेपाल कम्युनिष्ट पार्टी देखिएको परिचयपत्र र विज्ञप्ती लेखिएका ६ ठेली पनि बरामद भएको छ।
यसैगरि विभिन्न राजनीतिक दर्शन लेखिएका १३ वटा किताव, केहि नगद रकम तथा नेकपाको छाप एक थानलगायतका बन्दोवस्तीका सामानहरु प्रहरीले बरामद गरिएको जनाएको छ।
