बारा – नेपाल भित्र्याइएको लाखौँको पटाकासहित तीन जनालाई प्रहरीले नियन्त्रणमा लिएको छ।

बारा प्रहरीले अवैध रुपमा पिकअप भ्यानमा ल्याउदै गरिएको उक्त ठूलो परिमाणमा पटाका बरामद भएको शुक्रबार पत्रकार सम्मेलनमार्फत सार्वजनिक गरेको हो। 

पक्राउ पर्नेमा जितपुर सिमरा उपमहानगरपालिका १८ बडहर्वाका सुकमान लामा, कलैया उपमहानगरपालिका १ बिरेन्द्र यादव र १८ वर्षिय रुपेश दास छन्। बरामद गरिएको पटाकाको बजार मूल्य १२ लाख रुपैयाँ रहेको छ।

८ वटा ठूलो बोरामा राखी ना ४ च ६९५९ नम्बरको बोलेरो जिपमा लोड गरी लुकाईछिपाई नेपाल भित्र्याउँदै गरेको अवस्थामा छोटकी फुुलवरियास्थित सडकबाट उनीहरुलाई गाडीसहित नियन्त्रणमा लिइएको प्रहरीले जनाएको छ।

बाराका प्रहरी उपरीक्षक विकासराज खनालले अवैध रुपमा भारतबाट नेपाल भित्र्याउँदै गरेको अवस्थामा प्रहरीले चेकजाँचको क्रममा कलैया उपमहानगरपालिका १३ छोटकी फुलवरियाबाट बिहीबार राती ठूलो परिमाणमा पटाकासहित ३ उनीहरुलाई पक्राउ गरिएको बताए।

पटाकासहित पक्राउ परेकाहरु उपर मुलुकी अपराधसंहिता २०७४ को विस्फोटक पदार्थ सम्बन्धी कसुरमा जिल्ला अदालतबाट म्याद थप गरी थप अनुसन्धान सुरु गरिएको प्रहरीले जनाएको छ।