सप्तरी । बाबरी मस्जिद– राम मन्दिर विवादमाथि भारतीय सर्वोच्च अदालतले शनिबार अन्तिम फैसला गरेसँगै नेपालमा पनि फैसलाको स्वागत गर्दै दीप प्रज्वलन गरिएको छ । फैसलाको स्वागत गर्दै शनिवार नेपालका विभिन्न स्थानमा दीप प्रज्वलन गरिएको हो ।

विश्व हिन्दु परिषद् नेपालले वीरगंजमा नेपाल भारत मैत्री युवा संघ सप्तरीको आयोजनामा सप्तरीको राजविराजस्थित जनआन्दोलन चौकमा, जिरोमाइल यूवा क्लवले जनकपुरमा दिप प्रज्वलन गरेका हुन् ।

यसैगरी वैष्णव संघ नेपाल, विश्व हिन्दु परिषद, हिन्दु जागरण महासंघ, एकल विद्यालय अभियान लगायतले पनि विज्ञप्ति मार्फत निर्णयको स्वागत गरेका छन् ।

भारतको सर्वोच्च अदालतले अयोध्याको विवादित स्थल राम मन्दिरलाई दिन र मस्जिदका लागि छुट्टै जमिन दिन आदेश दिएको छ। सर्वोच्च अदालतका मुख्य न्यायधिश रञ्जन गोगोईको अध्यक्षतामा रहेको संवैधानिक इजलासले शनिबार उक्त विवादमाथि फैसला सुनाएका हुन्।

४० दिनसम्मको लगातार सुनुवाइ १६ अक्टोबरमा सकिएको थियो। गोगोईले शुक्रबार उत्तर प्रदेश उच्च अधिकारीलाई बोलाएर फैसलाका दिन कानुनी व्यवस्था कडा बनाउन निर्देशन दिएका थिए। फैसलालाई ध्यानमा राखेर अयोध्यामा भारी मात्रामा सुरक्षाकर्मी परिचालन गरिएको भारतीय संचारमाध्यामले जनाएका छन्।

सुरक्षाकै कारण उत्तर प्रदेश, कर्नाटक, मध्य प्रदेश, दिल्ली रराजस्थानमा विद्यालय र कलेज बन्द गरिएको छ।

 

- यो सामग्री पब्लिक न्युज एजेन्सी डट कम (publicnewsagency.com ) बाट साभार गरिएको हो । यहाँले पनि पब्लिक न्युज एजेन्सीबाट सामग्री निःशुल्क प्राप्त गरी पुनः प्रकाशन गर्न सक्नुहुनेछ ।