दाङ - दाङमा शुक्रबार ट्याक्टर दुर्घटना भएकाे छ। उक्त दुर्घटनामा परी तीन जनाको मृत्यु भएको छ भने २३ जना घाइते भएका छन्। जिल्लाको गढवा गाउँपालिका–५ चिसापानी भन्ने स्थानमा भैलोको पिकनिक खाएर फर्कँदै गरेको चढेको रा १ त २३९३ नम्बरको ट्याक्टर पल्टिएको हो।

दुर्घटनामा परि गढवा गाउँपालिका वडा नम्बर ६ का ११ बर्षिया निनु पुन, सोही स्थानकी १२ वर्षीया सीमा परियार र सोही स्थानकै १२ वर्षीया सुनिता पुन मगरको मृत्यु भएको जिल्ला प्रहरी कार्यालयले जनाएको छ।

उनीहरुको गढवा स्वास्थ्य चौकीमा उपचारका क्रममा मृत्यु भएको प्रहरीले जनाएको छ। घाइते २३ जना मध्य ४ जनाको अवस्था गम्भीर रहेको र १९ जनाको अवस्था सामान्य रहेको प्रहरीको भनाइ छ। उनीहरुको लमही अस्पतालमा उपचार भैरहेको छ। ट्याक्टरको ट्रलि पल्टिँदा दुर्घटना भएको हो।