चितवनः विद्यार्थीसँग लिएको अतिरिक्त शुल्क फिर्ता वा समायोजन गर्ने सहमति कलेजले उल्लंघन गरेको आरोप लगाउँदै चितवन मेडिकल कलेज (सिएमसी) को शिक्षण युनिटमा विद्यार्थीले आइतबारदेखि तालाबन्दी गरेका छन् । माग पूरा नहुँदासम्म तालाबन्दी जारी रहने चिकित्सा शिक्षा संघर्ष समितिका संयोजक प्रकास चन्दले जारी गरेको प्रेस विज्ञप्तीमा उल्लेख छ ।

यसअघि विद्यार्थीले भदौमा पनि आन्दोलन गरेका थिए । आन्दोलन चर्कंदै गएपछि सिएमसीले असोज ४ गते चितवन जिल्ला प्रशासन कार्यालयमा कलेजका आन्दोलनरत विद्यार्थी र अभिभावकहरुसँग सहमति गरेको थियो । त्यो बेला भएको पाँच बुँदे सहमतिमा मेडिकल शिक्षामा सरकारले तोकेको भन्दा विद्यार्थीबाट लिएको बढी शुल्क कात्तिक १८ गतेभित्र फिर्ता गर्ने उल्लेख थियो । कस्लाई कति शुल्क फिर्ता वा समायोजन गर्ने भनेर प्रतिवेदन दिन समिति पनि बनेको थियो । तर प्रतिवेदन नै आएन ।

कात्तिक १५ गते सिएमसी प्रशासनले पत्रकार सम्मेलन आयोजना गरेर शैक्षिकसत्र ०७५र७६ मा भर्ना भएका एमबीबीएस र डिडिएसका विद्यार्थीबाट लिएको भनिएको अतिरिक्त शुल्क मात्रै समायोजन गर्ने बताएको थियो । सरकारले एमबीबीएसका लागि तोकेको ४२ लाख ४५ हजार रुपैयाँ शिक्षण शुल्कमा ६ लाख रुपैयाँ अतिरिक्त लिएको कलेजले स्वीकार गरेको छ । त्यसमध्ये दुई लाख रुपैयाँ मात्रै समायोजन गर्ने कलेजको भनाइ छ ।

शिक्षण शुल्कका अतिरिक्त रजिष्ट्रेशन शुल्क, परीक्षा शुल्क, मेडिकल काउन्सिल दर्ता शुल्क, संस्थागत शुल्क, कम्युनिटी शुल्क, इनर्टनसिप शुल्क, आन्तरिक परीक्षा शुल्क, खाना र होस्टेल शुल्क लिन मिल्ने चितवन मेडिकल कलेजका अध्यक्ष तथा प्रबन्ध निर्देशक डा। हरिश न्यौपानेको तर्क छ । यी शिर्षकको शुल्क चार लाख रुपैयाँसम्म पर्ने हुँदा अतिरिक्त लिएको ६ लाखबाट दुई लाख रुपैयाँ मात्रै समायोजन गर्ने न्यौपानेको भनाइ थियो ।

तर कलेज प्रशासनको यो घोषणा विद्यार्थीले अस्विकार गर्दै आन्दोलनमा जाने बताएका थिए । सिएमसी प्रशासनले कुनै पनि शुल्क फिर्ता नगर्ने बताइ सकेको छ । रकम फिर्ता वा समायोजन गर्ने भनेको अन्तिम दिन कात्तिक १८ गते सोमबार विद्याथीले पत्रकार सम्मेलन राखेर शैक्षिकसत्र ०७२र७३ देखिकै रकम फिर्ता र समायोजन हुनु पर्ने अडान दोहर्‍याए । चार शैक्षिक वर्षमध्ये सुरुका दुई वर्षको अतिरिक्त शुल्क फिर्ता हुनु पर्ने र पछिल्ला दुई वर्षको शुल्क समायोजन हुनु पर्ने विद्यार्थीको माग छ । 
 

चितवन मेडिकल कलेज तालाबन्दी