काठमाडौं – सामाजिक सञ्जाल तथा युट्युवमार्फत चर्चामा आएका एक 'अघोरी बाबा'की श्रीमतीलाई प्रहरीले नियन्त्रणमा लिएको छ।  महानगरीय प्रहरी वृत बौद्धको टोलीले विजय केसी भनिने अघोरी बाबाकी श्रीमती शारदा पाण्डेलाई नियन्त्रणमा लिएको हो।

सोमबार गौशलाबाट विदेश पठाउने भन्दै ठगी गरेको आरोपमा पाण्डेलाई सोधपुछ गर्न बोलाएकाे महानगरीय प्रहरी परिसरका प्रवक्ता हाेविन्द्र बाेगटीले बताए। 'ठगीको उजुरी परेपछि बाबाकी श्रीमतीलाई केही सोधपुछ गर्न बोलाएका हौं,' डिएसपी बोगटीले भने।

केसी 'लाइफ ड्यामेज' बाबाको रुपमा परिचित छन्। पछिल्लो समय उनी शारदा पाण्डेसँगको विवाह गरेको कारण पनि चर्चामा आएका छन्। श्रीमती पाण्डेले विदेश पठाइदिने भन्दै पैसा लिएर ठगी गरेको प्रहरीले जानकारी दिएको छ। उनी श्रीमान बाबासगैँ सुन्दरीजलको एउटा कुटीमा बस्दै आएकी छन्।