प्युठान।  प्युठानमा जीप दुर्घटना हुँदा ३ जनाको मृत्यु भएको छ।  

स्वर्गद्वारी नगरपालिका–४ भिंगृदेखि खालतर्फ जाँदै गरेको ग २ च ५२४९ नम्बरको पिकअप जिप स्थानीय मनभीर भन्ने स्थानमा दुर्घटना भएको हो। 

दुर्घटनामा परि १ जनाको घटनास्थलमा नै र २ जनाको उपचारका क्रममा भैरहवा मेडिकल कलेजमा मृत्यु भएको जिल्ला प्रहरी कार्यालय प्यूठानले जनाएको छ। मृत्यु हुनेमा स्वर्गद्वारी नगरपालिका–२ जोगिमाराकी २५ वर्षीय बिना विक, उनका आठ वर्षीय छोरा आन्न विक र स्वर्गद्वारी खालकी ४० वर्षीय नजरी विक रहेको प्रहरीले जनाएको छ।  

जीप चालक घाइते भएका छन।  उनको हाल भैरहवा मेडिकल कलेजमा उपचार भइरहेको छ।  बिहीबार बिहान पानी बोकेर भिंगृबाट स्वर्गद्वारी तर्फ जाँदै गरेको जिपसडकबाट करिब तीन सय मिटर तल खसेको थियो।