काठमाडौँ ।  रेस्टुरेन्टहरुको बारेमा सम्पूर्ण जानकारी उपलब्ध गराउने उदेश्यले नेपालमा नै पहिलो पटक 'रेस्ट्रो मेनु' एप संचालनमा आएको छ ।  

स्मार्ट अनलाइन सोलुसन प्रालिले आयोजना गरेको एक कार्यक्रमका बीच होटल उद्यमी, लेखक तथा सामाजिक अभियन्ता कर्ण शाक्यले उद्घाटन गरे । कार्यक्रममा बोल्दै शाक्यले युवाहरुले प्रविधिको सहि सदुपयोग गर्दै यस्ता कार्यहरुको सबैले अनुशरण गर्नुपर्नेमा जोड दिएका छन। 

यसैबीच एपको पूर्ण सफलताको शुभकामना दिदै यदि युवाहहरुले यस्तै यस्तै कार्य गर्दै जाने हो भने देशले विकासको गति लिन धेरैबेर नलाग्ने समेत उनको भनाइ छ।  

'रेस्टुरेन्ट पारखीहरुले अब एउटा मोबाइल एपको प्रयोग मार्फत आफूले मनमा लागेको कुरा रोजेर खाना खान मिल्ने र एपमा कुन खानाको मूल्य कति भन्ने जानकारी लिन मिल्ने' स्मार्ट अनलाइन सोलुसनका अध्यक्ष ध्रुव शर्माले जानकारी दिए ।

विदेशमा लोकप्रिय बनेको प्रविधि नेपालमा भित्रीएपछि आफुले रोजेको र खोजेको खाना खान अब भोतारिदै हिड्नु पर्ने अवस्थाको अन्त्य हुने पनि अध्यक्ष शर्माले बताए ।  हाल काठमाडौं लगायत नेपालका प्रमुख पर्यटकीय ठाउँ पोखरा, चितवन, लुम्बिनी र भैरहवा सहित नेपालका विभिन्न स्थानका करिब दुई हजार रेस्टुरेन्ट यस एपमा आबद्ध भइसकेका छन् ।

'रेस्ट्रो मेनु' एपले रेस्टुरेन्ट संचालकको आफ्नो ब्यवसाय प्रवर्द्धन गर्ने र ब्यवसायलाई आधुनिक प्रविधिसंग जोडी सरल र सहज बनाउने विश्वास लिइएको छ । यसको प्रयोगबाट महत्वपूर्ण समय र पैसाको समेत बचत हुने अनुमान गरिएको छ। 

६ महिनामा करिब ५ हजार, १ बर्ष भित्रमा नेपाल अधिराज्यका करिब दश हजार रेस्टुरेन्ट यस एपमा जोड्ने र आगामी २ बर्ष भित्र अन्तर्राष्ट्रिय स्तरमा समेत जोड्ने योजना रहेको निर्माण पक्ष स्मार्ट अनलाइन सोलुसनले जनाएको छ । 

अहिलेको युग भनेको प्रविधिको युग हो सबैका हात हातमा स्मार्ट मोबाइल छन् हरेक किसिमबाट आधुनिक प्रबिधिको उपयोग बढी रहेको अवस्थामा यो एप हालको समयको माग रहेकाले पुर्ण सफल हुनेमा निर्माण पक्ष ढुक्क देखिन्छ ।

कार्यक्रममा सफल व्यबसायी तथा समाजसेवी खुमा अर्याल लगायत बिभिन्न संघसंस्थाका प्रतिनिधि, होटल व्यबसायी, पर्यटन व्यबसायी र कलाकार लगायतको सहभागिता रहेको थियो । कार्यक्रममा स्मार्ट अनलाइन सोलुसन प्रालिका म्यानेजिङ डिरेक्टर सुरेश रेग्मी, म्यानेजर जगत नेपाल लगायतले एपका बिषयमा जानकारी दिएका थिए ।

 

'रेस्ट्रोमेनु' मोबाईल एप