लहान– चार दिवसीय महापर्व छठको शनिबार मुख्य दिन– ‘सझुकाअर्घ।’ तराई–मधेसलगायत मुलुक भरका नदी, खोला, पोखरी र नहर किनारलाई ब्रतालु एवं आगन्तुकको स्वागतमा झकिझकाउ पारिएको छ। शनिबार ब्रतालु तथा परिवारजनले घरघरमा बिहानदेखि लोकप्रिय प्रसाद ठेकुवा, भुसुवा, खाजा भनिने एक प्रकारको मिठाई तयार पार्छन्।

अपरान्हः घरको आँगनलाई लिपपोत गरी चोख्याउँछन्। चोखो ठाउँमा बाँसको नांग्लो र ढाकी मिलाएर राख्छन्। नांग्लोमा पुजा सामग्री सजाउँछन्। एकपटक घरमै कुल देउतालाई पुजा गरेपछि सामग्रीसहितको नांग्लोलाई पुनः ढाकीमा सजाउँछन्। त्यसमाथि सावधानीकासाथ बलिरहेको दियो राख्छन्।

यसपछि नयाँ पहिरनमा ब्रतालुसहित सारा परिवार पुजा सामग्री बोकेर घाटतिर लाग्छन्। प्रसादले भरिएको ढाकी भने जिम्मेबार व्यक्तिलाई बोक्न लगाउँछन्।

लोक आस्थाको यो पर्वको तेस्रो दिन शनिबार साँझ एवं चौथो दिन आइतबार बिहान झिलिमिली सिंगारिएको जलाशय किनारमा सम्पूर्ण पवित्र सामग्रीसहित पुगेपछि ब्रतालु एवं परिवारजनले सूर्यदेवलाई अर्घ दिन्छन्।

बिहानीको अर्घ लगतै छठ माताको महिमाको कथा वाचनसहित चार दिने धार्मिक अनुष्ठानको समापन हुन्छ। अटल सौभाग्यको कामना गर्दै महिला ब्रतालुले एक अर्काको निधारमा रातो टीका पनि लगाइदिन्छन्।