लाहुरेको भन्दा गुन्टाको फुरफुर बढी भन्छन् नि ! सम्माननीय राष्ट्रपतिज्यूको इज्जत, प्रतिष्ठा, मर्यादा, आन्दोलनको भूमिका, योगदान हेर्दा उहाँबारे टिकाटिप्पणी गरिरहनुपर्ने कारण छैन् । तर, ‘गुण्टाको फुरफुर’ले बिगार्दैछ ।

उहाँको अघिल्लो कार्यकालदेखिकै सल्लाहकार, मानवअधिकारवादी नेताले इन्धनमा रहर गर्दा त्यस्तो स्थिति आएको हो । पञ्चायतकालदेखि नै राजबन्दीको रिहाइ, मानवअधिकारको रक्षामा काम गर्दै आउनुभएका सुशील प्याकुरेल अहिले सुविधास्वरुप विद्युतीय गाडी चढ्नुहुन्छ । राष्ट्रपतिका लागि पनि त्यस्तै गाडी ल्याइएको छ ।

ती गाडीमा जम्मा एक हजार रुपैयाँको ब्याट्री चार्ज गरे पुग्छ । तर, महिनैपिच्छे १ सय ५० लिटर इन्धनवापतको रकम माछापुच्छ बैंकको खातामा निकासाको विवरण हेरेर महालेखापरीक्षक कार्यालयका हाकिमहरुको टाउको चक्कराएको छ । कि त गाडीमा सिस्टम नै फेरेर विद्युतीय गाडीमा पनि पेट्रोल लाग्ने बनाएको हुनुपर्छ नत्र सुशील सरको नाममा तेलको पैसा बुझेर अरु कसैले खल्ती भरेको हुनुपर्ने बुझाइ छ महालेखातिर ।

सुशील राज्यमन्त्रीसरहको सुविधा लिने सल्लाहकार हुनुहुन्छ । तलव सुविधा जोड्दा मासिक ७० हजार पुग्छ । जबकी सम्माननीय राष्ट्रपतिकै निम्ति ल्याइएको अगुस्ता हेलिकोप्टर उहाँले चढिरहनुभएको छैन, खर्चालु हुन्छ भनेर । यही कारण अहिलेसम्म पनि ४ हजार केजीभन्दा बढी सामान बोक्ने हेलिकोप्टर एमआई १७ मै सवार हुने गर्नुभएको छ । अगुस्ता हेलिकोप्टरमा ५,७ जनाभन्दा बढी चढ्न मिल्दैन । उहाँसंग हिँड्ने मानिस अलि बढी नै हुन्छन् । 

संगसंगै राष्ट्रपतिको नाम भजाएर दूताबासबाट भिसा लिने अर्को धन्दा छ । छोरीको विवाह सकेर आउँछु भन्दै पर्यटक भिसामा अमेरिका गई उत्तै वेपत्ता हुने काम पनि त्यहाँको विज्ञ समूहमा बसेका मान्छेले गरिसकेका छन् । लामो इतिहास भएका, जननेता मदन भण्डारीसंगै सहयोगी भूमिका निभाएका मान्छेहरु नै राष्ट्रपतिको टिममा नियुक्त हुने र त्यही आडमा विदेश पलायन हुने क्रम देखिएको हो ।

त्यस्ता मान्छेहरु भिसाको म्याद थप्दै उतै बस्ने, देश नफर्कने भएपछि भिसानोट लेखिदिने परराष्ट्र मन्त्रालयको ध्यानाकर्षण भएको छ । उहाँका सुरक्षा सल्लाहकार पूर्व तीनतारे जर्नेल नेत्रबहादुर थापा पनि अहिले अमेरिकामै रहनुभएको अभिलेखबाट देखिन्छ । 

स्वयं राष्ट्रपति त्यसरी मितव्ययी र स्वच्छ आचरणको नमूनाका रुपमा प्रस्तुत भइरहँदा उहाँको सचिवालयका पदाधिकारी ‘ठूलो हात’ गर्नतिर लागेको यो प्रसंगले देशको चिन्ता गर्नेहरुलाई दुखी बनाउँछ नै । 

यो विषयमा जनआस्थाले सल्लाहकार सुशील प्याकुरेलसंग प्रतिक्रिया माग्दा ‘सम्माननीय राष्ट्रपतिज्यूकै आग्रहअनुसार इलेक्ट्रिक गाडी चढ्न थालेको’ बताए । एकातिर इन्धन बचत, अर्कोतिर वातावरण किफायती, प्रदूषण नहुने । तर, गाडी त त्यसै गुड्दैन । त्यसका लागि समय समयमा चार्ज गर्नुपर्छ । चार्ज गर्नेले इलेक्ट्रिक खर्च पाउँदैन । नीतिगत रुपमा त्यसरी रकम लिन समस्या रहेछ । त्यही कारण मैले फ्यूल खर्च लिँदै आएको हुँ । यस्ता ससाना कुरामा मिडियाकर्मी साथीहरु लाग्नुभएन । पहिला मानवअधिकार आयोगमा थिएँ । अरु आयुक्त गाडी आफैंले चलाए पनि ड्राइभरको पैसा आफैंले बुझ्थे तर मैले त्यसो गरिन ।    

जनआस्था साप्ताहिकबाट साभार ।
 

सुशील प्याकुरेल विद्युतीय गाडी