प्रधानमन्त्री आेलीकाे थप उपचारबारे निर्णय गर्न चिकित्सकहरूको बैठक
काठमाडौं – प्रधानमन्त्री केपी शर्मा ओलीको उपचारमा संलग्न चिकित्सकहरूले थप उपचारका लागि बैठक बसिरहेका छन्।
प्रधानमन्त्रीको हालसम्मको उपचारको समीक्षा र भावी उपचारको रणनीति तय गर्न डा अरुण सायमीको सम्योजकत्वमा मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा बैठक बसिरहेको सचिवालयका एक सदस्यले जानकारी दिए।
बैठकमा प्रधानमन्त्रीलाई मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा राखेर उपचार गर्ने वा शिक्षण अस्पतालमा सार्ने बारेमा छलफल हुँदै गरेको डा अरुण सायमीले जानकारी दिए।
हाल उपचाररत मनमोहनमा डाइलासिस मेसिन नभएकाले प्रधानमन्त्रीलाई शिक्षण अस्पतालमा सार्न छलफल थालिएको हो। मंगलबार बिहान अत्याधिक पेट दुखेपछि प्रधानमन्त्री ओलीलाई महाराजगञ्जस्थित मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा भर्ना गरिएको थियो। एपेन्डिक्स मार्फत पेटमा संक्रमण भएपछि उनी गम्भीर बिरामी परेका थिए।
प्रधानमन्त्री ओलीको मंगलबार शल्यक्रिया गरिएको थियो। अहिले उनको स्वास्थ्य उल्लेखनीय सुधार देखिएको अस्पतालले जनाएको छ। यद्यपि उनलाई सघन उपचारको सम्पूर्ण व्यवस्थासहित निरन्तर निगरानीमा राखिएको अस्पतालका कार्यकारी निर्देशक प्राडा. उत्तम कृष्ण श्रेष्ठद्वारा हस्ताक्षरित विज्ञप्तिमा जनाइएको छ। आजै प्रधानमन्त्रीले नेकपाका महासचिव, आफ्ना सल्लाहकारलाई भेट्नुका साथै आफ्नो सामान्य सक्रियता शुरु गरेको बताइएको छ ।
