इटहरी - इटहरीमा बलात्कारको आरोपमा 'सिद्धबाबा' पक्राउ परेका छन्। सिद्धबाबा भनिने कृष्णदास गिरीलाई सुनसरी प्रहरीले पक्राउ गरेको छ। सुनसरीको चतरास्थित आफ्नो आश्रमबाट उनलाई प्रहरीले पक्राउ गरेको हो। 

बलात्कार आरोप लागेसँगै आश्रमबाट बाहिरिएका उनलाई शुक्रबार बिहान नियन्त्रणमा लिइएको सुनसरी प्रहरीले जनाएको छ। गिरीलाई जिल्ला अदालत सुनसरीबाट पक्राउ पुर्जी जारी गरेर प्रहरीले समातेको हो। 

गिरीमाथि कार्तिक ४ गते अनुयायी महिलालाई बलात्कार गरेको आरोप लागेको हो। महिलाले आफूलाई भेट्न बोलाएर चतरास्थित आश्रममै बलात्कार गरेको आरोप लगाएकी हुन्। शुत्रबार बिहानैदेखि आश्रम छोडेर उपचार गर्न भन्दै विराटनगर हिँडेका उनी प्रहरी हिरासतमा पुगेका हुन्।

बलात्कारसम्बन्धी जाहेरी जिल्लाले लिन नमानेपछि पीडित पक्ष केन्द्रीय अनुसन्धान ब्यूरो (सिआइबी)मा पुगेको थियो। जाहेरीपछि सिआइबीको टोली जिल्ला प्रहरी कार्यालय सुनसरी आएको थियो। सिआइबीले पीडित महिलाको स्वास्थ्य परीक्षण गरेर जाहेरी सुनसरी पठाएको हो।

सुनसरी प्रहरी प्रमुख यज्ञ बिनोद पोखरेलले घटनाको थप अनुसन्धान भइरहेको बताए।