काठमाडौं । एक लाख बढी घुस लिएको घटना सार्वजनिक भएपछि गृह मन्त्रालयमा तानिएका दोलखाका प्रमुख जिल्ला अधिकारी खगेन्द्रप्रसाद रिजालमाथि अख्तियार दुरुपयोग अनुसन्धान आयोगले छानविन थालेको छ । अभद्र व्यवहारसम्बन्धी कसूरका अभियुक्तहरुसँग रिजालले  एक लाख ११ हजार घुस लिएको घटना सार्वजनिक भएपछि अख्तियारले छानविन थालेको हो।

रिजालले मेलुङ गाउँपालिका–४, भेड्पुका कुमार लामा मोक्तानसँग ९० हजार र कालिञ्चोक गाउँपालिका–१ का उदिम तामाङ र इन्द्रबहादुर तामाङसँग बुधबार २१ हजार रुपैयाँ असुलेको आरोप लागेको थियो ।  आयोगका प्रवक्ता प्रदीपकुमार कोइरालाले रिजालले आफ्नो क्षेत्राधिकारभित्रका मुद्दाका अभियुक्तलाई धरौटीमा रिहा गर्न घुस रकम लिएको सूचना पत्रपत्रिकामा प्रकाशित भएपछि अनुसन्धान थालिएको बताए ।

उनले भने, ‘रिजालले भ्रष्टाचारजन्य कार्य गरेको सम्बन्धमा अनुसन्धान भइरहेको अवस्थामा निज पदमा बहाल रहिरहँदा आफ्नोविरुद्धको प्रमाण लोप तथा नष्ट गर्ने वा अनुसन्धान र तहकिकातमा बाधा व्यवधान पुग्न सक्ने भएकाले उनलाई अख्तियार दुरुपयोग अनुसन्धान आयोग ऐन, २०४८ को दफा १९ को उफदफा ९३० बमोजिम निलम्बन गर्नका लागि गृह मन्त्रालय सिंहदरवारमा लेखी पठाइएको छ ।’

गृह मन्त्रालयका प्रवक्ता केदारनाथ शर्माले भने आयोगको पत्र आफू कहाँ आइनसकेको बताए । उनले अनलाइनखबरसँग भने, ‘आयोगबाट पत्र आइसक्दा निलम्बन गर्छौं ।’ उनका अनुसार शुक्रबार गृह तानिएका रिजालको सामान्य प्रशासन मन्त्रालयमा सरुवा गरिएको थियो ।