काठमाडौंः सत्तारुढ नेकपाले प्रशिक्षण कक्षा नियमित चलाउने गरी नयाँ पाठ्यक्रम निर्माण गर्ने भएको छ । स्कुल विभागको बैठकले पाठ्यक्रम निर्माण भएलगत्तै कक्षा सञ्चालन गर्ने जनाएको छ । ‘बैठकमा स्कुल विभागको नयाँ पाठ्यक्रमसहित तीनवटा मस्यौदा छलफलका लागि प्रस्तुत भएका थिए,’ स्कुल विभागका उपप्रमुख बेदुराम भुसालले भने, ‘ती दस्ताबेज आवश्यक सुझाबसहित अर्को बैठकबाट पारित गरिने छन् ।’ विभागमा उपप्रधानमन्त्री तथा रक्षामन्त्री ईश्वर पोखरेल प्रमुख, भुसाल र देवेन्द्र पौडेल उपप्रमुख छन् । 

पाठ्यक्रमसहित प्रशिक्षण कक्षा सञ्चालनसम्बन्धी निर्देशिकाको मस्यौदामा प्राप्त सुझाबसहित २२ मंसिरमा बैठक बसी तीनवटै दस्ताबेजलाई अन्तिम रूप दिने विभागले सहमति गरेको भुसालले बताए । नेकपाले पार्टी एकतासँगै समाजवादउन्मुख जनताको जनवादलाई अन्तरिम राजनीतिक कार्यदिशा अवलम्बन गर्ने तय गरेको छ ।

नेकपाभित्र पूर्वएमाले समूहको एउटा पंक्ति जनताको बहुदलीय जनवादलाई नै पार्टीको मार्गदर्शक सिद्धान्त र अन्तरिम राजनीतिक कार्यदिशासमेत मानेर जानुपर्ने पक्षमा छ । विभागका प्रमुख पोखरेल स्वयंले त्यसैको वकालत गर्दै आएका थिए । विभाग प्रमुख भएपछि भने उनी त्यसबारे मौन छन् ।

विभागलाई ३५ सदस्यीय बनाएर पूर्णता दिनका लागि समेत स्कुल विभागले गृहकार्य अघि बढाएको छ । विभागका सदस्य छनोटका निम्ति बिहीबारको बैठकले ४ वटा मापदण्ड पनि बनाएको छ । जसअनुसार विषयविज्ञ नेताहरू मात्र विभागका सदस्यमा छनोट हुनेछन् । त्यस्तै, विषयविज्ञ पार्टीनिकट बुद्धिजीवीहरू–प्राध्यापक, वकिल, विभिन्न क्षेत्रका अनुसन्धानकर्ता, स्कुल विभाग व्यवस्थापनमा दख्खल राख्ने व्यक्तित्व र सूचना प्रविधिमा दक्ष व्यक्तिलाई मात्र विभागमा छनोट गर्न सक्ने गरी मापदण्ड बनेको भुसालले बताए । यो समाचार आजको नयाँ पत्रिका दैनिकबाट लिइएको हो ।

नेकपा प्रशिक्षण पाठ्यक्रम