काठमाडौं-  भारतमा लगेर नेपाली युवतीलाई बलि चढाउने तयारी गरेको आशंकामा प्रहरीले ७ जनालाई पक्राउ गरेको छ।प्रहरीले ६ जनालाई विराटनगर र एक जनालाई काठमाडौंबाट पक्राउ गरेको हो। पक्राउ पर्नेमा दुई युवती पनि छन्।

काठमाडौंमा एक फेसन हाउस सन्चालन गर्दै आएकी ती युवतीलाई मोडलिङको अफर गर्दै भारत पुर्‍याउने योजना रहेको प्रहरीको दावी छ।

पीडित युवतीले शंका लागेर प्रहरीलाई उजुरी गरेपछि गिरोह फेला परेको हो। गिरोहले भनेअनुसार युवतीलाई काम गर्न लगाएर प्रहरी पछिपछि लागेको थियो। तर एकपछि अर्को बहाना बनाउँदै सीमा कटाउन खोजेपछि प्रहरीले गिरोहका सदस्यलाई नियन्त्रणमा लिएको थियो।

प्रहरीले पक्राउ परेकाको नाम सार्वजनिक गरेको छैन। यसबारे बिहीबार पत्रकार सम्मेलन गर्ने तयारी काठमाडौं परिसरको छ।