काठमाडौँ — उपसभामुख शिवमाया तुम्बाहाङ्फेले मेराे कारणले प्रतिनिधिसभाको बैठक स्थगित नभएको बताएकी छन् । उनले सभामुख चयनमा कुनै काेणबाट बाधक नबन्ने स्पष्ट समेत पारेकी छन्।

शुक्रबारका लागि बोलाइएको प्रतिनिधिसभाको बैठक सूचना टाँसेर स्थगित गरिएपछि तुम्बाहाङ्फेले आफ्ना कारण बैठक स्थगित नभएको संचारकर्मीलाई बताएकी हुन्।

‘सभामुख चयनमा म बाधक छैन् । राजीनामा दिन तयार भएर बसेकी छु,’ उनले भनिन, ‘आजको बैठक स्थगनमा मेरो राजीनामा कारक होइन ।’

नेकपाका नेताहरुले उपसभामुख तुम्बाहाङ्फेले राजीनामा दिए मात्रै बैठक सञ्चालन गर्न संसद सचिवालयलाई सन्देश दिएका थिए । सोही बमोजिम सचिवालयले राजीनामा प्राप्त नभएपछि उपसभामुखसँगको सल्लाहमा बैठक सूचना टाँसेर १६ गते १ बजेसम्मका लागि स्थगन गरेको छ ।
त्यसअघि प्रमुख प्रतिपक्षी नेपाली कांग्रेसले उपसभामुखले सभामुखको निर्वाचन प्रक्रिया अगाडि बढाए संवैधानिक जटिलता आउने नेकपालाई चेतावनी दिएको थियो ।

सभामुख र उपसभामुख फरक दलको हुनुपर्ने संवैधानिक व्यवस्था छ । सोही व्यवस्था अनुरुप नेकपाबाटै सभामुख बनेकी तुम्बाहाङ्फेले सभामुखको निर्वाचन प्रक्रिया अगाडि नेकपाले सभामुखमा उम्मेदवारी दिन नपाउने कांग्रेसको तर्क थियो ।