काठमाडौंः भारतको हैदरावादमा डाक्टरलाई जलाईएको घटनामा संदिग्ध ४ जना अभियुक्तलाई भारतीय प्रहरीले मारिदिएको छ । कुख्यात बलात्कार काण्डमा समातिएका ४ जना अभियुक्तहरुलाई बुधबार प्रहरी हिरासतमै राखिएको थियो । तर बिहीबार राति महिला चिकित्सक जलाइएकै स्थानमा लगेर उनीहरुलाई ‘इन्काउन्टर’ गरिएको अन्तर्राष्ट्रिय सञ्चारमाध्यमले लेखेका छन् ।

हैदराबाददेखि करिब ५० किलोमिटर टाढा पर्ने महबूब नगरस्थित चटनपल्ली गाउँमा बलात्कार एवं हत्यामा संलग्न अभियुक्तहरुलाई तेलङ्गना प्रहरीले गोली ठोकेको हो ।

आफूहरुमाथि नै आक्रमण प्रयास गरेपछि प्रतिकार गर्दा अभियुक्तहरु मारिएको प्रहरीले दाबी गरेको छ । २८ नोभेम्बरका दिन हैदराबादमा जलाएर हत्या गरिएको अवस्थामा २६ वर्षीय महिला चिकित्सकको शव बरामद गरिएको थियो ।

अनुसन्धानका क्रममा ती महिलामाथि बलात्कार समेत भएको पत्ता लागेको थियो । यो घटनापश्चात संदिग्धहरुलाई गिरफ्तार गरी १४ दिनसम्म न्यायिक हिरासतमा राखिएको थियो । न्यायिक हिरासतबाट बुझाएलगत्तै प्रहरीले चारै जनालाई इन्काउन्टरमा मारिदिएको हो । 

भारत हैदरावाद इन्काउन्टर