बाँके - ट्रकले बिद्यार्थीलाई ठक्कर दिएर घाइते बनाएपछि बाँकेको कोहलपुरमा विद्यार्थीले ट्रक जलाएका छन्। कोहलपुरबाट नेपालगन्जतर्फ आउँदै गरेको ना२ख ९४५९ नम्बरको ट्रकले आइतबार बिहान करिब साढे १० बजेतिर स्थानीय त्रिभुवन माध्यामिक बिद्यालयको कक्षा ७ मा अध्ययनरत छात्रा प्रकृती चन्दलाई ठक्कर दिएपछि आक्रोशित भएका विद्यार्थीले ट्रकमा आगजनी गरेका हुन् ।

ठूलो संख्यामा उपस्थित भएका विद्यार्थीले ट्रकमा आगजनी गर्ने क्रममा प्रहरीसँग झडप समेत भएको थियो । प्रहरीले स्थिती नियन्त्रणमा लिन दर्जनौं हवाई फायर गरेको बताइएको छ । प्रहरीले चालकलाई आफ्नो नियन्त्रणमा लिईसकेको जनाएको छ ।

यस्तै ट्रक पूर्ण रुपमा जलेको ईलाका प्रहरी कार्यालय कोहलपुरलाई उद्धृत गर्दै बाँकेका निमित्त प्रमुख जिल्ला अधिकारी कृष्णकान्त उपाध्यायले जानकारी दिए । ‘विद्यार्थीले आगजनी गरेका कारण ट्रक पूर्णमा जलेको छ, स्थिती अझै नियन्त्रणमा आउन सकेको छैन,’ उनले भने । तत्काल कफ्र्यु जारी गर्ने अवस्था भने नभएको निमित्त प्रजिअ उपाध्यायले बताए ।

कोहलपुर नगरपालिका वडा नम्बर ११ निवासी १२ वर्षीया घाईते चन्दको नेपालगन्ज मेडिकल कलेज शिक्षण अस्पताल कोहलपुरमा उपचार भईरहेको छ । दुबै खुट्टामा चोट लागेको उनको अवस्था गम्भिर रहेको बताइएको छ । प्रहरीले आन्दोलनमा दमन गरेको बिद्यार्थीले बताएका छन्।