भारतीय कांग्रेसी महासचिव प्रियंका गान्धी वाड्राले सोमबार लखनऊमा मेगा रोड शो गरिन् । लोकसभा चुनाव अभियानलाई मध्यनजर गर्दै प्रियंकाले आफ्ना भाइ कांग्रेसका अध्यक्ष राहुल गान्धी र प्रश्चिमी उत्तर प्रदेशका पार्टी संयोजक जोतिरादित्य सिंधियाका साथमा लखनऊमा रोड शो निकालेकी हुन् ।

 

उक्त शो मा कार्यकर्ताहरूको उत्साहजनक उपस्थिति रह्यो भने कांग्रेस कार्यकर्ताले उनको एक झलक आफ्नो मोबाइल फोनको क्यामेरामा कैद गर्नका लागि उत्साहित देखिए । तर रोड शोमा जम्मा भएका त्यसै भिडमा चोरहरूले आफ्नो जादू देखाएर ५० भन्दा बढी मोबाइल चोरी गरेको खबर आएको छ ।

 

प्रियंकाको रोड शो लखनऊ एयरपोर्टबाट कांग्रेस कार्यालय तक जाँदै थियो । उक्त शोका क्रममा ठूलो भिड रोडमा हिँडिरहेको थियो । कयौँ चोर पनि उक्त भिडमा सहभागी बनेर मौकामा चौका हाने । प्रियंकाको भिड लखनऊको सरोजनीनगर प्रहरी चौकी नजिक पुग्दा कयौँ कार्यकर्ताको मोबाइल चोरी भएको थाहा भयो ।

 

कांग्रेसका कार्यकर्ताले उक्त क्षेत्रमा मोबाइल चोरीको आरोपमा एकजनालाई पक्राउसमेत गरेर प्रहरीलाई बुझाए । उक्त व्यक्तिको साथमा चोरीको मोबाइल नभेटिएपछि उसलाई प्रहरीले छोडिदिएको थियो । कांग्रेस कार्यकर्ता अभिषेख सिंहले बताएअनुसार उनका साथी र अरू व्यक्तिका गरी ५० बढी मानिसका मोबाइल र पर्स चोरी भएका छन् । उक्त घटनाका बारेमा उजुरी सरोजनीनगर प्रहरी निरीक्षक त्रिलोकी सिंहलाई दिएता पनि उनले उजुरी दर्ता नगरेको बताइएको छ ।

 

र्‍यालीका क्रममा ड्युटीमा रहेका एसिएम प्रशासनको फोन पनि चोरी भएको छ । अर्कोतर्फ चोरले कांग्रेस कार्यकर्ता र नेताहरूका साथै कांग्रेस प्रवक्तासमेतका मोबाइलमा चोरले हातको सफाइ देखाएका छन् । उक्त क्रममा मिडियाकर्मीका मोबाइल पनि चोरी भएको छन् । प्रहरी साइबर सेलका सिओ अभय मिश्राले ५० भन्दा बढी व्यक्तिले मोबाइल चोरीको उजुरी दिएका छन् । उनका अनुसार मोबाइल चोरीको छानबिन सुरु भएको छ । मोबाइल सर्विलिंसमा लगाएर अनुसन्धान गरिँदै छ ।

भारतीय कांग्रेस प्रियंका गान्धी