ढाका । बंगलादेशको राजधानी ढाकामा बुधबार राति भएको आगलागीमा परी  ७० जनाकाे मृत्यु र दजनाै घाइते भएका छन् । जलेर मृत्यु हुनेमा अधिकांश महिला र बालबालिका रहेका छन् भने कैयौँको अवस्था गम्भीर रहेको ढाका प्रहरीले जनाएकाे छ ।

ढाकाको चवाक बजारमा रहेको एक घरमा ग्याँसको सिलीण्डर विस्फोट हुँदा आगलागी भएकाे हाे । आगलागीले  यहाँका कैयौँ घर जलेर नष्ट र जनधनको ठूलो क्षति भएकाे छ ।

 

आगलागी नियन्त्रण विभागका एकजना अधिकारी महफुज रिवनका अनुसार  सिलिण्डर पड्किएर आगलागी भएकाे घरसँगै रहेको अर्काे घरमा रासायनिक पदार्थहरु राख्ने  एक गोदाम रहेकोले आगो झन् बढेको हाे ।

 

बुधबार राति करिब १० बजेतरि शुरु भएकाे आगलागी  नियन्त्रणमा लिन निकै धेरै समय लागेको थियो । आगो नियन्त्रणका लागि कम्तीमा पनि ३७ ओटा दमकलको प्रयोग गरिएको र  बिहीबार  ३ बजेमात्र आगो नियन्त्रणमा आएकाे  रिवनले बताए ।

 

अग्नि नियन्त्रकहरुले अहिले पनि जलेका घरका भग्नावशेषमा लागेको आगो निभाउने प्रयास जारी राखेका छन् भने प्रहरीले यहाँको उद्वारको कार्य अझै सम्पन्न भइ नसकेको जनाएको छ । उद्वारको कार्य जारी नै रहेको, कति जनाको ज्यान गएको हो भन्ने बारेमा पनि यकिन हुन बाँकी रहेको  छ ।