काठमाडौं । राँगोले आक्रमणबाट चन्द्रागिरि नगरपालिकाको मच्छेगाउँमा एक व्यक्ति मृत्यु भएको छ। शनिबार बिहान राँगोको आक्रमणबाट स्थानीय ७० वर्षीय मानवीर महर्जनको मृत्यु भएको प्रहरीले जनाएको छ। उनको उपचारका क्रममा कीर्तिपुर अस्पतालमा मृत्यु भएको थानकोट प्रहरी वृत्तका डिएसपी कुमार विक्रम थापाले जानकारी दिए।

 

‘मर्निङ वाक’मा निस्किएका महर्जनलाई राँगोले आक्रमण गरेको थियो। राँगोको आक्रमणबाट उनी गम्भीर घाइते भएका थिए। उनलाई तुरुन्तै कीर्तिपुर अस्पतालमा पुर्‍याइएको थियो। त्यहाँ चिकित्सकले उनलाई मृत घोषित गरेका थिए।

 

राँगोले मान्छे मारेपछि स्थानीयले प्रहरीलाई खबर गरेका थिए। त्यसपछि महानगरीय प्रहरी वृत्त चन्द्रागिरीको टोली र स्थानीयबासीले राँगोलाई समात्ने प्रयास गरेका थिए। खेदेर दहचोक पुर्‍याएपछि प्रहरीले गोली हानेर राँगो मारेको थियो। प्रहरीले राँगोलाई नियन्त्रणमा लिन नसकेपछि दहचोकमा इन्काउन्टर गर्नुपरेको डिएसपी थापाले जानकारी दिए। इन्काउन्टरमा दुई गोली हानेको थियो।

राँगो