जुम्ला । जुम्लाको पातारासी गाउँपालिका–२ पेरे गाउँमा भेडाबाख्रा राख्ने गोठमा आगलागी हुँदा नौ लाख बराबरको क्षति भएको छ । 

 

स्थानीय मयलाल कामीको गोठमा आगलागी भएपछि ९४ वटा भेडाबाख्रा मरेका छन् । प्रतिभेडाको सात हजार रुपैयाँका दरले छ लाख ५८ हजार र गोठभित्रका अन्य लत्ताकपडा र भाँडाकुडा गरी झण्डै नौ लाख क्षति भएको हो । 

 

आगोले जलेर मरेका भेडाबाख्रा कैलो बुढा  र बिसे कामीका हुन् । वनबाट चराएर ल्याएका भेडाबाख्रा गोठमा हुलेको बेला आगलागी हुँदा पूर्ण रुपमा जलेर मरेको गाउँका वडाध्यक्ष कन्न बोहराले बताए । 

 

बुढा र कामीका भेडाबाख्रा सधैँ एउटै गोठमा राख्ने गरेका थिए । भेडाबाख्रा पालन  गर्दै आएका किसानका सबै भेडाबाख्रा जलेपछि हातमुख जोड्न समस्या हुने पीडित किसान बुढाको गुनासो  छ ।