एजेन्सी । यूरोपेली संघबाहिरबाट बेलायत पुग्ने आप्रबासीको संख्यामा १५ वर्षपछि यस वर्ष अत्यधिक वृद्धि देखिएको बिहीबार सार्वजनिक एक तथ्यांकमा जनाइएको छ।

 

राष्ट्रिय तथ्यांक कार्यालयले पछिल्लो समय जारी गरेको लामो समय बेलायत बसोबास गर्न जाने आप्रबासी संख्यामा एक वर्षको अन्तरालमा सन् २०१८ को सेप्टेम्बर अन्त्यसम्ममा छ लाख २७ हजार आप्रबासी बेलायत पुगेका र तीन लाख ४५ हजार आप्रबासी बाहिरिएको तथ्यांकमा उल्लेख छ ।

 

यसरी हेर्दा बेलायतमा रहने आप्रबासी संख्यामा दुई लाख ८३ हजार थप भएको देखिएको छ । तथ्यांकअनुसार धेरै व्यक्ति बेलायतमा एक बर्षभन्दा बढी रहने गरी गएका छन् । तथ्यांकको विश्लेषण गर्दा खुद आप्रबासीको आप्रवासन र बिदेश गमनको तथ्यांकमा सन् २०१६ को अन्त्यपछि स्थिरता देखिएको छ ।

 

तर कार्यालयले भनेको छ, आप्रबासी संख्यामा यूरोपेली संघ आवद्ध राष्ट्रबाट बेलायत जाने र अन्य मुलुकबाट बेलायत जाने तथ्यांकमा परिवर्तन देखिएको छ । बेलायतका लागि यूरोपबाट जाने आप्रबासीको तुलनामा अन्य मुलुकबाट बेलायत जाने नागरिकको संख्या सन् २००४ पछि पहिलोपटक बढी देखिएको छ । काम र पढाइका शिलशिलामा बेलायत आउने आप्रबासी संख्यामा विगत पाँच वर्ष यता बढ्दो क्रममा रहेको अध्ययनले देखाएको छ ।

 

सन् २००९ पछि पहिलो पटक सन् २०१८ मा बेलायत पुग्ने यूरोपेली नागरिकको सङ्ख्यामा क्रमश कमी आएको पाइएको छ ।  मध्य तथा पूर्वी यूरोपेली मुलुक, जसलाई इयूका आठ मुलुकबाट पनि चिन्ने गरिन्छ, का नागरिकको बेलायत आउनेभन्दा छोड्ने क्रम बढेको देखिएको छ । फर्किनेमा सन् २००४ पछि बेलायत आएर बसोबास गर्दै आएका यूरोपेली आप्रबासीहरू रहेका छन् ।

 

सन् २०१४ पछि बेलायतमा कामका लागि आउने व्यक्तिको सङख्याभन्दा विद्यार्थी भिषामा आउने यूरोपेली आप्रबासीको संख्यामा वृद्धि रहेको पनि तथ्यांकमा छ । समग्रमा बेलायत पुग्ने आप्रबासीमा पछिल्लो समय धेरै विद्यार्थीहरू रहने गरेको पनि जनाइएको छ ।

बेलायत युरोपेली संघ आप्रबासी