पूर्वराजा शाह पूर्वी पहाडी जिल्ला इलाम र पाँचथरमा
काठमाडौं । पूर्वराजा ज्ञानेन्द्र शाहले आइतबारदेखि पूर्वी पहाडी जिल्ला इलाम र पाँचथरको भ्रमण शुरु गरेका छन् । पूर्वराजा झापाबाट आइतबार इलाम पुगेका छन् । उनी सोमबार पाँचथर जाने कार्यक्रम तय भएको शिव सेना नेपालका अध्यक्ष अनिल बस्नेत ‘बाबा’ले जानकारी दिए । पाँचथरको कार्यक्रम सम्पन्न भएपछि इलाम फर्केर पूर्वराजाले नागरिकसँग भेटघाट गर्ने कार्यक्रम छ ।
अध्यक्ष बस्नेतका अनुसार इलाम र पाँचथरमा स्थानीय राजनीतिक दलका नेता तथा कार्यकर्ता एवं नागरिकले पूर्वराजासँग प्रत्यक्ष भेट्ने चाहना राखेका छन् । दूई जिल्लावासीले धेरैअघिदेखि पूर्वराजाको भ्रमण होस् भन्ने कामना गरेकै कारण पूर्वराजाले पनि प्राथमिकता दिएर भ्रमण तय गरेका हुन् । अध्यक्ष बस्नेतकाअनुसार पूर्वराजाले यसक्रममा नागरिकसँग साक्षात्कार गर्नेछन् । जनताका कुराहरु सुन्ने छन् ।
पूर्वराजाको भ्रमणमा स्वयंसेवक परिचालन, सुरक्षा व्यवस्थामा सहयोगी भूमिकाको जिम्मेवारी शिव सेना नेपालले सम्हाल्दै आएको छ । पूर्वराजाको हरेकजसो जिल्ला भ्रमणमा शिव सेना नेपालले सुरक्षामा सहयोग र स्वयंसेवक परिचालनको जिम्मेवारी पूरा गर्दै आएको छ । चैत २१ गते पूर्वराजा शाह झापा फर्र्किने कार्यक्रम रहेको छ । त्यसको एक सातापछि काठमाडौं फर्किन सक्ने सम्भावना रहेको अध्यक्ष बस्नेतले जानकारी दिए ।
