काठमाठौं ।  पूर्वउपप्रधान तथा अर्थमन्त्री भरतमोहन अधिकारीको निधन भएको छ । ह्याम्स अस्पतालका निर्देशक डाक्टर भाष्करराज पन्तका अनुसार ८३ वर्षीय अधिकारीको शनिबार राति ९ बजेर ३५ मिनेटमा निधन भएको हो।

 

एक पटक भौतिक पूर्वाधार तथा यातायात र चार पटक अर्थमन्त्री भएका अधिकारी ‘आफ्नो गाउँ आफैं बनाऊँ’ कार्यक्रम र वृद्धवृद्धालाई मासिक भत्ता वितरण गर्ने नेताका रूपमा चर्चित छन्। उनको पार्थिव शरीरलाई अन्तिम श्रद्धाञ्जलिका लागि नेकपाको केन्द्रीय पार्टी कार्यालय धूम्रबाराहीमा बिहान ९ बजेदेखि मध्याह्न १२ बजेसम्म राखिने भएको छ।

 

अस्पतालबाट बिहान ८ बजे उनको पार्थिव शरीरलाई पार्टी कार्यालय लगिने नेपाल कम्युनिस्ट पार्टी (नेकपा)का कार्यालय सचिव कृष्णगोपाल श्रेष्ठले बताए। उनका अनुसार अन्तिम श्रद्धाञ्जलिपछि शव यात्रासहित पशुपति आर्यघाटमा अधिकारीको अन्त्येष्टि गरिने छ।

भरतमोहन अधिकारी